“அத்தியின் மீதும், ஸைதூனின் மீதும், தூர் ஸீனீன் மீதும் பாதுகாப்பான இந்த நகரின் மீதும் சத்தியமாக, மனிதனை நாம் மிகச் சிறந்த (அக,புற) வடிவில் படைத்தோம், பின்னர் (நன்றி மறந்து நிராகரிக்கும் அவனை) படைப்பினங்களில் மிகவும் கீழ்த்தரமான படைப்பாக ஆக்கி விடுகிறோம், ஆனால் ஈமான் கொண்டு ஸாலிஹான நல்லமல்கள் புரிவோரைத் தவிர, அவர்களுக்கு நிலையான நற்கூலி இருக்கின்றது, (இத்தகைய அத்தாட்சிகளை அறிந்த) பின்னரும் சன்மார்க்கம் பொய்யானதென உமக்கு தோன்றக் காரணம் ஏது?, (இத்தகைய வல்லமையை அத்தாட்சிகளை கொண்ட) அல்லாஹ் நீதியாளன் இல்லையா? ” (ஸூரதுத் தீன்)

இது அல்குர்ஆனில் ஸூரதுத் தீன் எனும் மக்கிய அத்தியாயத்தின் கிட்டிய பொருளாக்கமாகும், இந்த ஸூரா அல்லாஹ் நீதியாளன் இல்லையா என்ற ஆச்சரியக் (கேள்விக்) குறியுடன் நிறைவுறுவதால்..

“ஆமாமாம் நிச்சயமாக, நாம் அதற்கு சான்று பகர்கின்றோம்.” என கூறிக் கொள்ளுமாறு எமது உயிரிலும் மேலான தலைவர் முஹம்மத் (ஸல்) அவர்கள் கற்றுத் தந்துள்ளதாக நபித் தோழர் அபூஹூரைரா (ரழி) அவர்கள் கூறியுள்ளார்கள்..

அத்தி, ஸைதூன், தூர் ஸீனா என பைதுல் மக்திஸையும் அது அமைந்துள்ள பிரதேசத்தையும், மூஸா (அலை) அவர்களோடு அல்லாஹ் பேசிய மலை அடிவாரத்தையும், புனித மக்கமா நகரையும் எடுத்துக் கூறி சத்தியம் செய்வதின் பின்னணி அஹ்லுல் கிதாபி களுடைய நபிமார்களான நபி ஈஸா (அலை), நபி மூஸா (அலை) மற்றும் இறுதி இறைதூதர் முஹம்மத் (ஸல்) மற்றும் ஏனைய நபிமார்கள் எல்லோருக்குமே அருளப்பட்ட மனித வர்க்கத்திற்கான தூதுகள் அடிப்படையில் ஒன்றென உணர்த்துவதற்காகும் என பல தப்ஸீர் ஆசிரியர்கள் குறிப்பிட்டுள்ளார்கள்.

அதே போன்று அத்தி ஸைதூன் என மனிதனது வாழ்வாதாரத்திற்கு தேவையான அனைத்தையும் அவனுக்கு வசப்படுத்திய அல்லாஹ்வின் வல்லமையையும் அது நினைவுட்டுவதாகவும் விளக்கங்கள் தரப்பட்டுள்ளன!

உன்னதமான படைப்பினமாகிய மனிதன் தானாகவே நன்றி மறந்து இறை நிராகரிப்பு செய்து தனது உன்னதத் தன்மையை இழந்து கீழ்மட்ட படைப்பினமாக ஆகிவிடுகின்றான்.. அன்றியும் அவனை அநியாயமாக அல்லாஹ் தண்டிப்பதில்லை! என்ற வாழ்வியல் யதார்த்தத்தை இந்த அத்தியாயம் உணர்த்துகின்றது.

அல்லாஹ் வின் கலாம் அல்குர்ஆன் ஸூராக்களை வசனங்களை பொருளுணர்ந்து ஓதி அதன்படி வாழ்ந்து உன்னதமான மனிதர்களாக பிறவிப் பயனை ஈருலக ஈடேற்றங்களை அடைந்து கொள்ள அவ்வல்லோன் எம்மனைவருக்கும் தவ்பீஃக் செய்வானாக!

உங்களது ஆத்மார்தாதமான துஆக்களில் எம்மை எமது பெற்றார் உடன் பிறப்புக்கள் மனைவி மக்கள் ஆசான்கள் நாம் பிரார்தனை செய்யக் கடமைப் பட்டோர் அனைவரையும் சேர்த்துக் கொள்ளுங்கள்.

இதனை ஒரு ஸதகதுல் ஜாரியாவாக அதிகமதிகம் பகிர்ந்து பணியில் பங்காளராகுங்கள்!
🤍
மஸிஹுத்தீன் இனாமுல்லாஹ்
09.08.2022

அந்த இளைஞர், குழந்தைப் பருவம் முதல் மிகவும் செல்லமாகவும் செழிப்பாகவும் சகல வசதி வாய்ப்புக்களுடன் ஒரு செல்வந்தர் குடும்பத்தில் பிறந்து வளர்ந்தவர், அவரது அழகும்,வசீகரமும், அறிவும் தெளிவும், தூய்மையும் அவர் அணியும் விலை உயர்ந்த ஆடைகளும் அவர் உபயோகிக்கின்ற விலை உயர்ந்த வாசனைத் திரவியங்களும் மக்கா வாசிகள் மத்தியில் அவருக்கு தனித்துவமான அடையாளத்தையே தந்திருந்தன.

அவர் இயல்பாக பெற்றிருந்த அறிவும் ஆற்றலும் பேச்சுத் திறனும் எந்தவொரு சபையிலும் அவருக்கு பெரும் வரவேற்பை பெற்றுத் தந்திருந்தன.

இறைதூதர் (ஸல்) அவர்களது நுபுவ்வத் மக்காவாசிகள் மத்தியில் பரபரப்பான பேசுபொருளாக இருந்த ஆரம்ப நாட்களில் அர்கம் எனும் நபித் தோழர் இல்லத்தில் இறைதூதரை சந்தித்து தெளிவு பெற்று இஸ்லாத்தை ஏற்றுக் கொள்கிறார்கள்.

என்றாலும், செல்வாக்கு மிக்க குடும்பத்தில் செல்வாக்கு மிக்க தனது தாயாரின் எதிர்ப்பை சம்பாதித்துக் கொள்ள விரும்பாது இஸ்லாத்தை ஆரம்ப நாட்களில் மறைத்தாலும் பின்னர் வீட்டில் இருந்து சகல சம்பத்துகளையும் சுக போகங்களையும் துறந்து வெளியேறும் நிலை ஏற்படுகிறது.

இரண்டு முறை அபீசீனியா ஹபஷாவிற்கு ஹிஜ்ரத் சென்று திரும்புகிறார்கள், பசி பட்டினி, வறுமையின் உச்சத்தில் ஒட்டுப் போடப்பட்ட ஆடைகளுடன் காட்சி தருகின்றார்கள்.

அவரது அறிவு ஆற்றல் திறமை கண்டு யத்ரிப் மாநகரிற்கு (தற்போதைய மதீனமாநகர்) இறைதூதர் (ஸல்) அவர்களது முதலாவது பிரதிநிதியாக அனுப்பி வைக்கப் படுகின்றார்.

நபுவ்வத் 11 ஆம் ஆண்டு துல்ஹஜ் மாதம் மதீனாவில் இருந்து வருகை தந்த கஸ்ரஜ் கோத்திரத்தைச் சேர்ந்த சிலர் மினா வெளியில் இறைதூதருடன் அகபா என்ற இடத்தில் உடன்படிக்கை செய்து கொண்டு மதீனா திரும்பி இருந்தனர், அவர்களுடன் இணைந்து தனது பணிகளை மேற்கோண்ட அந்த நபித் தோழர் நுபுவ்வத் 12 இல் சுமார் 70 மதீனா வாசிகளுடன் இறைதூதரை துல்ஹஜ் மாதம் சந்திக்கின்றார்கள்.

தொடர்ந்து யத்ரிப் மாநகர் நோக்கி ஹிஜ்ரதுர் ரஸூல் இடம் பெறுகிறது, அந்நகரின் பெயர் மதீனதுர் ரஸூலில்லாஹ் எனப் பெயரும் பெறுகிறது.

குறைஷிக் காஃபிர்கள் தொல்லை அதிகரிக்கிறது, பத்ர் யுத்தம் நடை பெற்று அடுத்த கட்டமாக உஹத் யுத்தம் இடம் பெறுகிறது..

இறைதூதர் ஸல் அவர்களை எதிரிகள் சுற்றி வளைத்த போது தனது வலக்கரத்தில் கொடியை ஏந்திய வண்ணம் அந்த இளம் நபித் தோழர் ஏனைய வீரர்களுக்கு அறைகூவல் விடுத்த வண்ணம் ஓடோடி வருகின்றார் நபியவராகள் சிறிய காயங்களுடன் காப்பாற்றப் படுகிறார்கள்..

எதிரிகளுடன் போராட்டம் தொடர்கிறது நபியவர்களது சிறிய தந்தை உற்பட பலர் ஷஹீதாக்கப் படுகிறார்கள்.

கொடியை ஏந்தியிருந்த நபித் தோழரின் வலக்கரம் வெட்டப் படுகிறது, இடக்கரத்தில் ஏந்திக் கொள்கிறார்கள், இடக்கரம் வெட்டப்பட மார்பினால் தாங்க முயற்சித்து பின்னர் எதிரிகளின் அம்புகளுக்கு இலக்காகி ஷஹீதாகு கின்றார்கள்…

யுத்த களத்தில் ஷூஹதாக்களுடைய ஜனாஸாக்கள் தேடி நல்லடக்கம் செய்யப்பட்ட போது அந்த ஸஹாபியை கபனிடுவதற்கு ஒரு போர்வை மாத்திரமே இருந்தது, அதனால் தலைக்கு கீழ் பகுதியை கபன் செய்து தலைப்பகுதியை இலைகளால் மறைக்குமாறு இறைதூதர் ஸல் ஆலோசனை கூறுகின்றார்கள்..

பின்னர் ஷுஹதாக்களுக்குரிய இறுதிக் கடமைகளை நிறைவேற்றிய இறைதூதர் ஸல் அவர்கள்..

அல்லாஹ்வுடன் தாம் செய்து கொண்ட உடன்படிக்கையை நிறைவேற்றிய சில வீரர்கள்.. என்ற அல்குர்ஆன் வசனத்தை ஓதி விட்டு..

இந்த ஷுஹதாக்களுக்காக துஆ செய்து ஸலாம் சொல்லுங்கள், நிச்சயமாக அவ்வாறு ஸலாம் சொல்வோருக்கு பதில் சொல்லப்படும் என உபதேசம் செய்தார்கள்..!

இன்றுவரை ஹஜ் உம்ரா யாத்திரைக்கு செல்பவர்கள் உஹத் களத்திற்கு சென்று ஷுஹதாக்களுக்காக பிரார்த்தனை செய்து ஸலாம் கூறி வருகின்றார்கள்.

மக்காவில் செல்வச் செழிப்புடன் அழகிய ஆடைகள் நறுமணங்களுடன் வாழ்ந்து மதீனா மாநகரில் உஹத் களத்தில் கபன் துணி கூட போதாமல் உலகிற்கு விடை தந்த அந்த நபித் தோழர் வேறு யாருமல்ல..

முஸ்அப் இப்னு உமைர் (ரழி) அவர்கள், அத்தகைய உன்னதமான தியாகிகளின் அர்ப்பணங்கள் மீது தான் உலகெங்கும் வாழ் எங்களுக்கு இனிய மார்க்கம் இஸ்லாம் கிடைத்திருக்கிறது.
🤍
மஸிஹுத்தீன் இனாமுல்லாஹ்
10.08.2022 SHARE

இறைதூதர் முஹம்மத் (ஸல்) அவர்களைப் பார்த்து குறைஷிக் காபிர்கள் ஏளனமாக பல விடயங்களை கூறினார்கள் என்பதனை நாம் அறிவோம்..

தன்னை ஒரு நபியாக பிரகடனம் செய்ததன் பின்னர் குறைஷி குலத்தில் இருந்து உறவுகள் துண்டிக்கப்பட்டு தனிமைப் படுத்தப்பட்டவர் என்றும்..

தனது மகன் காஸிம் (அலை) வபாஃத் ஆனதன் பின் ஆண் வாரிசுகளற்ற, பெயர் சொல்ல சந்ததிகளற்ற ஒரு மனிதர் என்றும் ..

உலகத்தில் குல வம்ச பெருமைகள் இழந்த ஆட்சி அதிகாரம் செல்வம் செல்வாக்கு அற்ற முகவரியற்ற தனியாளாக தனிமைப்படுத்தப் பட்ட ஒருவர் என்றும், அவர்கள் கூறி நோவினை செய்வார்கள்..

நபித்தோழர் அனஸ் (ரழி) அவர்கள் அறிவிக்கின்றார்கள், ஒருமுறை இறைதூதர் (ஸல்) அவர்கள் சிறிய மயக்க நிலையின் பின் புன்னகைத்துக் கொண்டு விழித்தார்கள்.. காரணத்தை கேட்ட பொழுது எனக்கு தற்போது ஒரு ஸூரத் அருளப்பட்டது எனக்கூறி “இன்னா அஃதய்னாக அல் கவ்தர்” எனும் சிறிய ஸூராவை ஓதினார்கள்..

(நபியே) உமக்கு நாம் அல்கவ்தரை தந்துள்ளோம், நீர் உமது இரட்க்ஷகனை தொழுது குர்பானியையும் அறுத்துப் பங்கீடு செய்வீராக, உம்மைத் தூற்றுபவர் தான் நிச்சயமாக “அப்தர்” ஆவார்.

இங்கு சொல்லப்பட்டுள்ள கவ்தர் அப்தர் என்ற ஒன்றுக்கொன்று எதிர்ச் சொற்கள் குறித்து பல அறிவிப்புக்களை விளக்கங்களை தப்ஸீர் ஆசிரியர்கள் கூறியுள்ளார்கள்..

கவ்தர் என்றால் அதிகரித்த செல்வம் என்றும் அப்தர் என்றால் எதுவுமற்ற அனைத்தையும் இழந்த நிலை என்றும் அன்றைய அரபு மொழி பிரயோகங்கள் காணப்பட்டதாக மொழியியல் விளக்கம் தரப்பட்டுள்ளது.

நுபுவ்வத், இஸ்லாம், அல்குர்ஆன், தொழுகை உற்பட ஐம்பெரும் கடமைகள், இறுதிநாள் வரையும் அதற்குப் பிறகும் பெயர் கூறப்படல், ஸலவாத்தும் ஸலாமும் சொல்லப்படல், மறுமையில் ஷபாஅத்து செய்யும் தனிச் சிறப்பு, சுவனத்தில் ஹவ்ழுல் கவ்தர் எனும் தடாகம் என இம்மை மறுமையில் இறை தூதர் ஸல் அவர்களுக்கு தரப்படும் அனைத்து அதிகரித்த அருட் கொடைகளையும் அல் கவ்தர் எனும் பிரயோகம் குறிப்பதாகவும்..

உலகில் சாதி குலப் பெருமை வம்சாவழி வாரிசுகள், ஆட்சி, அதிகாரம், செல்வம் செல்வாக்கு எல்லாம் இருந்தும் அல்லாஹ் வும் அவனது தீன் இஸ்லாமும் இல்லாத நிலையே அப்தர் எனும் அனைத்து சம்பதாதுக்களும் துண்டிக்கப்பட்ட நிலை என்றும் தப்ஸீர் வியாக்கியானங்கள் கூறுகின்றன.

ஆகவே இம்மை வாழ்வில் ஈடேற்றம் பெற்ற இறை தூதர் ஸல் அவர்களது உம்மத்தைச் சேர்ந்தவர்கள் நாளை மறுமையிலும் சுவனத்திலும் அவர்களோடு இருப்பார்கள், இறைதூதர் (ஸல்) அவர்களுக்கு விசேடமாக தரப்படும் ஹவ்ழுல் கவ்தர் எனப்படும் தடாகத்தில் அல்லது அருவியில் இருந்து நீர் அருந்துவார்கள்…!

ஆக, எமது உயிரிலும் மேலான தலைவருக்கு இம்மை மறுமைப் பேருகளாக தரப்பட்ட அல்கவ்தரில் அவர்களது உம்மதாதாகிய எமக்கும் பங்கு நிச்சயமாக இருக்கின்றது என்பதனை ஹவ்ழுல் கவ்தர் தடாகம் பற்றிய அறிவிப்புக்கள் உணர்த்துகின்றன.

எனவே, துன்யா ஆகிராவின் அனைத்து அருட்பாக்கியங்களையும் அதிகமதிகமாக, அல்கவ்தர் எனும் வற்றா நீரூற்றாகப் பெற்ற முழுமதியாம் முஹம்மத் (ஸல்) அவர்களை நிராகரித்தவர்கள் அவர்தம் வழி நடக்காதவர்கள் தான் எல்லாம் இருந்தும் அனைத்தையும் இழந்த அப்தர்கள் என இந்த அத்தியாயம் எமக்கு வாழ்வின் யதார்த்த நிலையை கற்றுத் தருகிறது.

மஸிஹுத்தீன் இனாமுல்லாஹ்
11.08.2022

தமீம் இப்னு அவ்ஸ் அத்தாரி (ரழி) அவர்கள் கிரிஸ்தவத்திலிருந்து ஹிஜ்ரி 9 ஆம் ஆண்டு இஸ்லாத்தை தழுவிய ஒரு நபித் தோழர், தஜ்ஜால் குறித்து அவர் அறிவித்த ஒரு தகவலை இறைதூதர் (ஸல்) அவர்கள் உறுதிப்படுத்திய ஹதீஸ் பிரபலமானது, ஹிஜ்ரி 40 இல் பலஸ்தீனில் வபாஃத் ஆனார்கள்.

அவர்கள் அறிவித்த ஒரே ஒரு ஹதீஸ் தான் முஸ்லிம் கிரந்தத்தில் பதிவாகியுள்ளது, ஒருமுறை இறைதூதர் (ஸல்) அவர்கள் எம்மிடம் மூன்று முறை “அத்தீனுன் நஸீஹத்” என கூறினார்கள், அப்படி என்றால் என்ன என்று வினவிய பொழுது அல்லாஹ்விற்கும் அவனது ரஸூலிற்கும் அவனது கிதாபிற்கும், ஆட்சி, நிர்வாக தலைமைகளிற்கும், பொது மக்களிற்கும் நஸீஹத் செய்வது என விளக்கம் தந்தார்கள் என அந்த அறிவிப்பில் கூறப்பட்டுள்ளது.

பொதுவாகவே நஸீஹத் என்றால் நல்லுபதேசம் என்று தான் பிரயோகிக்கப் படுகிறது, என்றாலும் இந்த ஹதீஸ் சற்று பரந்த கருத்தாழமிக்க ஹதீஸ் என்பதனை ஹதீஸ் துறை விற்பன்னர்கள் வியாக்கியானம் செய்துள்ளார்கள்.

“நஸஹ, நஸூஹ், நுஸ்ஹ் ” என்ற அரபு மொழிப் பிரயோகம் தூய்மை, சுத்தம், அப்பழுக்கற்ற தன்மை என்பதனை குறிப்பதாக மொழியியல் வல்லுநர்கள் கூறுகின்றார்கள்.

அல்லாஹ்வுடன், அவனது தூதருடன், அல்குர்ஆனுடன் உளத் தூய்மையுடன், இதய சுத்தியுடன் ஆத்மார்த்தமாக உண்மையாக நேர்மையாக ஆழமான உறுதியான நம்பிக்கை விசுவாசத்துடன், ஷிர்க்கு, குஃப்ரு, நிபாக்கு நயவஞ்சகம் இன்றி நடந்து கொள்வதும் வழிப்படுவதும் நஸீஹத் என விளக்கம் தரப்பட்டுள்ளது.

அதே போன்று ஆட்சி நிர்வாக தலைமைகளுடனும் பொது மக்களுடனும் உண்மையாக நேர்மையாக இதய சுத்தியுடன் விசுவாசமாக நடந்து கொள்வது, உண்மையை நன்மையை நீதி யை நிலை நிறுத்த ஒத்துழைப்பது.

அநீதி அராஜகம், அக்கிரமம், அடக்குமுறைகளுக்கு எதிராக எழுந்து நிற்பது, நன்மைகளை ஏவி தீமைகளை தடுப்பது நல்லுபதேசங்கள் செய்வது அவர்கள் பால் உள்ள நஸீஹத் ஆகும்.

அவர்களை நயவஞ்சகத் தனமாக ஏமாற்றுவது சூழ்ச்சிகள் செய்வது, வரியிறுப்பாளர்கள் பொதுமக்களை நேரடியாக மறைமுகமாக சூரையாடுவது, அராஜகம் அநீதி அக்கிரமங்களுக்கு ஊழல் மோசடிகளுக்கு துணை நிற்பது எல்லாமே சன்மார்க்க முரணான செயற்பாடுகளாகும்.

அல்லாஹ்விற்கும் ரஸூலிற்கும் அல்குர்ஆனிற்கும் ஆத்மார்த்தமான இதய சுத்தியுடன், உளத்தூய்மையுடனான விசுவாசத்தை வழிப்படுதலை கொண்டுள்ள ஒரு சமூகம் ஆட்சியாளர்கள் தலைமைகள் பொதுமக்களது விவகாரங்களில் உண்மையாக நேர்மையாக இதய சுத்தியுடன் நடந்து கொள்ளா விட்டால் அவர்களது தீன் பூரணமாவதில்லை அங்கு கோளாறு இருக்கின்றது என்பதனை இந்த நபிமொழி எமக்கு உணர்த்துகிறது.

ஈமான் கொண்டு ஸாலிஹான நல்லமல்கள் புரிந்து தமக்கு மத்தியில் சத்தியத்தை சகிப்புத் தன்மையை நல்லுபதேசம் வஸிய்யத் செய்து கொள்வோரன்றி அனைவரும் நஷ்டத்தில் தோல்வியில் இருப்பதாக அல்குர்ஆனும் எமக்கு எச்சரிக்கை விடுத்துள்ளதனை நாம் அறிவோம்.

உங்கள் ஆத்மார்த்தமான துஆக்களில் எம்மையும், எமது பெற்றோர், உடன் பிறப்புக்கள், மனைவி மக்கள், ஆசான்கள், ஆத்மார்த்தமாக அறப்பணிகள் புரிவோரையும் நினைவில் கொள்ளுங்கள்.
🤍
மஸிஹுத்தீன் இனாமுல்லாஹ்
13.08.2022 SHARE