Tuesday, October 19, 2021
Home Blog

ஒவ்வொரு ஆன்மாவும் தனித்துவமானது பிரத்தியேகமான ஒரு காரணி இம்மை மறுமை ஈடேற்றத்துக்கு காரணமாகலாம்!

மனிதர்கள் ஒவ்வொருவரும் தனித்துவமானவர்கள், ஒவ்வொரு ஆன்மாவும் தனித்துவமான ஒரு காரணியின் மூலம் அல்லாஹ்வின் அருளை, கருணையை, பாவமன்னிப்பை, சுவனத்தை அடைந்து கொள்ள முடியும்..

ஒரு சமூகத்தின் இருப்புக்கும் பாதுகாப்பிற்கும் அச்சுறுத்தல் வருகின்றபொழுது அந்தச் சமூகத்தின் சகல் தரப்பினருக்கும் “பர்ளு அயின்’ கட்டாய கடமையாக விதிக்கப் படுகின்ற பல்வேறு விடயங்கள் இருக்கின்றன.

சிலருக்கு அல்லாஹ் அறிவு ஞானத்தை வழங்கியிருப்பான், சிலருக்கு களத்தில் குதித்து உழைக்கும் உடல் பலத்தை, துணிவை வழங்கியிருக்கின்றான், சிலருக்கு சிறந்த மொழியாற்றல், எழுத்தாற்றல் பேச்சாற்றலை வழங்கியிருக்கின்றான், அதிலும் சிலருக்கு பன்மொழிப்புலமை கிடைக்கப் பெற்றிருக்கிறது.

இன்னும் சிலருக்கு சிறந்த PR எனும் பிறருடன் நல்ல தொடர்பாடல் ஆளுமை செல்வாக்கு பரந்த அளவில் தொடர்புகள் கிடைக்கப் பெற்றிருக்கும், சிலரிடம் கூட்டங்கள் சந்திப்புக்கள் நடத்துவதற்கான இட வசதிகள் இருக்கும், சிலரிடம் அறிஞர்களை உலமாக்களை புத்திஜீவிகளை செயற்பாட்டாளர்களை அழைத்துச் செல்ல வாகன வசதிகள் இருக்கலாம்.

இளம் தலை முறையினரிடம் நவீன தகவல் தொழில் நுட்ப அறிவு இருக்கிறது, சிறந்த ஆய்வுப் பணிகளை மேற்கொள்ளும் திறனும் நுட்பங்களும் இருக்கின்றன, சிறந்த முகாமைத்துவ நிர்வாக தகைமைகள் இருக்கின்றன, துறைசார் நிபுணர்களிடம் பல்வேறு எதிர்பார்க்கப் படுகின்ற வளங்கள் இருக்கின்றன.

இன்னும் பலரிடம் அல்லாஹ் செல்வத்தை தந்து வைத்திருக்கின்றான், இவ்வாறு பல்வேறு தரப்புக்களிடமும் பல்வேறு அருள் பாக்கியங்களை அள்ளி வழங்கியுள்ள அல்லாஹ் கூட்டு சமூக வாழ்வில் தத்தமது பங்களிப்புக்களை தத்தமது சக்திகளுக்கு ஏற்ப செய்தேயாக வேண்டும் என்பதை எதிர்பார்க்கின்றான்; இது ஒவ்வொருவரினதும் சௌகரியங்களுக்கு விருப்பு வெறுப்புகளுக்கு ஏற்ற ஏற்ற தெரிவு அல்ல கடமையாகும்.

அல்ஹம்துலில்லாஹ், தமது கஷ்ட நஷ்டங்களிற்கும் குறை நிறை களிற்கும் மத்தியில் மிகப் பெரும் தியாகங்களோடு பலர் களத்தில் சிறந்த பங்களிப்புக்களை செய்து கொண்டிருக்கின்றார்கள் அவர்களுக்கும் தேவைகளும் கடமைகளும் இருக்கின்றன அவர்களுக்கு தேவையான ஒழுங்குகள் செய்து கொடுக்கப் பட வேண்டியுமுள்ளன.

அடுத்த சமூகங்களில் உள்ள எழுத்தாளர்கள் ஊடக வியலாளர்கள் பலரை நீதி நியாயத்திற்காக குரல் கொடுக்கும் பலர் ஊக்குவிக்கப்படல் மிக முக்கியமான ஒரு விடயமாகும்.

தயவு செய்து உங்கள் ஊரில் தேசிய மட்டத்தில் நடைபெறுகின்ற உயரிய பணிகளுக்கு தாராளாமாக உதவுங்கள், இயன்ற பங்களிப்பினை கட்டாயம் நாம் செய்ய வேண்டும் , இன்றேல் நிச்சயமாக காலம் கடந்து கை சேதப் படுவோம் அல்லாஹ்விடம் எங்களுக்கு வழங்கப்பட்ட நிஃமத்துக்கள் அமானிதங்கள் பற்றி பதில் கூற கடமைப் பட்டுள்ளோம் . வெளிநாடுகளில் வசிப்போர் தங்களை ஒழுங்கு படுத்திக் கொள்ளுங்கள்.

மனிதர்கள் ஒவ்வொருவரும் தனித்துவமானவர்கள், அவர்களுக்கு வழங்கப்பட்டுள்ள, அறிவு, ஆற்றல்கள், இயல்பூக்கங்கள், உள்ளுணர்வுகள், திறமைகள், பலம், பலவீனம், வளங்கள்…

ஒவ்வொருவரும் வளரும் வாழும் கற்கும் சுற்றுச் சூழல்கள், சந்தர்ப்பங்கள், வசதி வாய்ப்புக்கள், குடும்ப சமூக பொருளாதார காரணிகள்…என பெற்றவைகள், கற்றவைகள், பட்டவைகள்..

ஒவ்வொருவரும் வாழ்வில் எதிர் கொள்கின்ற பிரச்சினைகள், சவால்கள், தேடல்கள், தேவைகள், ஆசைகள்….ஒவ்வொருவர் மீதுமுள்ள பொறுப்புக்கள், சுமைகள், எல்லாமே வேறுபட்டவைகளாக இருக்கின்றன…

ஒவ்வொரு ஆத்மாவையும் அவற்றின் சக்திக்கு ஏற்பவே எல்லாம் வல்ல அல்லாஹ் சோதிக்கின்றான், எல்லோரையும் எல்லா நிலையிலும் அங்கீகரிக்க காத்திருக்கின்றான்…

முழுமையாக எங்களை நாம் ஒவ்வொருவரும் எல்லாம் வல்ல அல்லாஹ்விடம் எம்மை சமர்ப்பிப்போம்..!

அல்லாஹ்வின் கருணையின் மீது அருளின் மீது எவரும் நம்பிக்கை இழக்க வேண்டாம்!

“அல்லாஹ் எந்த ஓர் ஆத்மாவுக்கும் அது தாங்கிக் கொள்ள முடியாத அளவு கஷ்டத்தை கொடுப்பதில்லை. அது சம்பாதித்ததின் நன்மை அதற்கே, அது சம்பாதித்த தீமையும் அதற்கே!

(முஃமின்களே! பிரார்த்தனை செய்யுங்கள்;) “எங்கள் இறைவா! நாங்கள் மறந்து போயிருப்பினும், அல்லது நாங்கள் தவறு செய்திருப்பினும் எங்களைக் குற்றம் பிடிக்காதிருப்பாயாக! எங்கள் இறைவா! எங்களுக்கு முன் சென்றோர் மீது சுமத்திய சுமையை போன்று எங்கள் மீது சுமத்தாதிருப்பாயாக! எங்கள் இறைவா!

எங்கள் சக்திக்கப்பாற்பட்ட (எங்களால் தாங்க முடியாத) சுமையை எங்கள் மீது சுமத்தாதிருப்பாயாக! எங்கள் பாவங்களை நீக்கிப் பொறுத்தருள்வாயாக! எங்களை மன்னித்தருள் செய்வாயாக! எங்கள் மீது கருணை புரிவாயாக! நீயே எங்கள் பாதுகாவலன்; (எங்கள் மீது போர் தொடுக்கும்) சய்தியத்தை நிராகரிப்போர் மீது எங்களுக்கு உதவி செய்தருள்வாயாக!”(ஸுரத்துல் பகறா 2: 286)”

மஸிஹுத்தீன் இனாமுல்லாஹ்

18.10.2021 (மீள்பதிவு)

 

 

16 அக்டோபர் 2021 வட கிழக்கு பிரிக்கப்பட்டு 15 வருடங்கள், கிழக்கு அரசியலில் மாற்றம் வேண்டும்!

(கிழக்கிலங்கை முஸ்லிம்கள் பல்வேறு நியாயமான காரணங்களுக்காக தமக்கான பிரத்தியேகமான அரசியல் அணியொன்றை மாகாண சபைத் தேர்தலுக்கு முன்னர் அமைத்துக் கொள்தல் ஆரோக்கியமான நகர்வாக இருக்கும்.)

Eastern Sri Lanka – Early settlement

இந்திய இலங்கை ஒப்பந்தத்தின் மூலம் 1987 வடக்குடன் கிழக்கை இணைத்தது அன்றைய ஜே ஆர் ஜயவர்தன தலைமையிலான ஐக்கிய தேசியக் கட்சி அரசு, அதனை முஸ்லிம்களின் முதுகில் எழுதிய அடிமைச் சாசனம் என்று முஸ்லிம் காங்கிரஸ் போர்க் கோடி தூக்கியது.

அதன்பின் 1994 ஆட்சி மாற்றத்தின் பிரதான பங்காளியாக மாறிய முஸ்லிம் காங்கிரஸ் 2000 ஆண்டுவரை சந்திரிக்கா தலைமையிலான பொதுசன ஐக்கிய முன்னணியின் பிரதான பங்காளியாக இருந்தது.

தலைவர் அஷ்ரஃபின் மரணத்திற்குப் பின் 2001 ஆம் ஆண்டு பொதுசன ஐக்கிய முன்னணி அரசு சதி மூலம் கவிழ்க்கப்பட்டு மீண்டும் ஐக்கிய தேசியக் கட்சி அரசு அமைய முஸ்லிம் காங்கிரஸ் ஒத்துழைப்பு வழங்கியது.

2002 பெப்ரவரி 24 அன்று அரசு புலிகளுடன் மோதல் தவிர்ப்பு ஒப்பந்தம் ஒன்றை செய்து வடகிழக்கில் புலிகள் கட்டுப்பாட்டுப் பகுதிகளை அவர்களின் சுயநிர்ணயத்தில் விட்டுவிட்டது அன்றைய ரனிலை பிரம மந்திரியாக கொண்ட அரசு.

முஸ்லிம் காங்கிரஸ் புலிகளுடன் நேரடியாக பெயரளவில் ஒரு புரிந்துணர்வு ஒப்பந்தம்செய்து கொண்டாலும் பின்னர் மோதல் தவிர்ப்பு ஒப்பந்தம் கூட முஸ்லிம்கள் முதுகில் எழுதப்பட்ட மற்றுமொரு அடிமைச் சாசணம் என உணரப்பட்டது. தனித்தரப்பு, தனி அலகு கோஷங்கள் செவிடன் காதில் ஊதிய சங்காகியது. வடக்கில் இருந்து கிழக்கு பிரிந்து தனித்திருக்க வேண்டும் என முஸ்லிம் அரசியலில் கோஷங்கள் எழும்பின.

2006 அக்டோபர் 16 இல் உயர் நீதிமன்றம் வடக்கு கிழக்கு மாகாணங்களை தனித்தனி மாகாணங்களாக பிரகடனம் செய்தது, வடக்கிலிருந்து கிழக்கை பிரிக்க வேண்டும் என ஜாதிக ஹெல உறுமய வழக்கு தாக்கல் செய்திருந்தது, அன்றைய ஜனாதிபதி மஹிந்த ராஜபக்ஷவும் அதே நிலைப்பாட்டில் இருந்தைம குறிப்பிடத் தக்க விடயமாகும்.

இந்திய இலங்கை உடன்பாட்டின்படி இணைக்கப்பட்ட வடகிழக்கில் தமிழ் தேசிய 13 ++ சுயாதிபத்தியத்தை இன்றும் தமிழ் தலைமைகள் கேட்டு அரசியல் போராட்டம் நடத்தி வருகின்றன, புவியரசியல் களநிலவரங்களும் இலங்கை அரசிற்கு பாரிய நெருக்கடிகளை ஏற்படுத்தி வருகின்றன.

தற்பொழுது இந்தியா 13 ஆவது அரசியல் சீர்திருத்தத்தை அமுல்படுத்தும் படியும் தமிழர் பிரச்சினைக்கு தீர்வு வழங்கும் படியும் வலியுறுத்தி வருகின்றமையும் உயர்மட்ட அதிகாரிகள் இலங்கைக்கு வருகை தந்த வண்ணமுமாக இருக்கின்றார்கள். வடகிழக்கு இணைப்பு பிரிப்பு எவ்வாறு இருப்பினும் மாகாண சபைத் தேர்தல்களை அடுத்த வருட ஆரம்பத்தில் நடத்த வேண்டிய கட்டாயத்தில் அரசு இருக்கின்றது .

இந்த நிலையில் ஏனைய மாகாணங்களில் போலன்றி கிழக்கு மாகாண முஸலிம்கள் தமக்கே உரிய பிராந்திய அரசியல் புவியரசியல் இராஜதந்திர பரிமாணங்களை உள்வாங்கி மாகாண சபைத் தேர்தலுக்கான அரசியல் வியூகத்தை வகுத்துக் கொள்ள வேண்டும்.

மலையக மக்கள் போன்று கிழக்கிலங்கை முஸ்லிம்கள் தமது பிராந்திய அரசியலை கையாள வேண்டும்!

கிழக்கிலங்கை முஸ்லிம்கள் பல்வேறு நியாயமான காரணங்களுக்காக தமக்கான பிரத்தியேகமான அரசியல் அணியொன்றை மாகாண சபைத் தேர்தலுக்கு முன்னர் அமைத்துக் கொள்தல் ஆரோக்கியமான நகர்வாக இருக்கும்.
 
அது தனியொரு இளைஞர் அணியாகவோ கட்சியாகவோ சுயேட்சைக் குழுவாகவோ அன்றி பலதரப்புகளையும் உள்வாங்கிய கூட்டணியாக சிவில் சமூக தலைமைகளின் பங்களிப்புடன் அமைக்கப்படுதல் சிறந்தது.
 
இந்திய அரசு 13 ஆவது அரசியல் சீர்திருத்தத்தை அமுல்படுத்த வலியுறுத்தும் புவியரசியலிலும் அண்மைக்கால தேசிய அரசியலில் ஏற்பட்டுள்ள மாற்றங்களிலும் கிழக்கிலங்கை முஸ்லிம்கள் கரிசனை கொள்ள வேண்டிய மிகவும் பிரத்தியேகமான பரிமாணங்கள் உள்ளன.
 
மலையக மக்கள் போன்று தமது பிராந்தியத்திற்குரிய விவகாரங்களை பட்டியலிட்டு முன்னுரிமைகள் அடிப்படையில் நிரல்படுத்தி அவற்றை மையமாக வைத்த மாகாண சபைத் தேர்தல் விஞ்ஞாபனத்தை தயாரிப்பதில் உடனடியாகவே கவனம் செலுத்துதல் நல்லது.
 
மேற்படி தெளிவான நிகழ்ச்சி நிரலுடன் தேசிய அரசியலில் கிழக்கிலங்கை முஸ்லிம்கள் சரியான பரிமாணங்களில் தம்மை இணைத்துக் கொள்வதே யுகத்திற்கான சரியான அரசியல் முன்னெடுப்பாக இருக்கும்.
 
வட மாகாணத்தில் சுமார் 5% முஸ்லிம்கள் கிடப்பில் உள்ள தமது விவகாரங்களை நிரல்படுத்தி தமது மாகாண சபைத் தேர்தல்களை வகுத்துக் கொள்தல் வேண்டும்.
 
தவறும் பட்சத்தில் கடந்த காலங்களில் போன்று பல்வேறு தேசிய பிராந்திய சர்வதேச சக்திகளின் நலன்களுக்காக எமது உரிமைகள் விலைபோகின்ற நிலைமைகள் ஏற்படலாம்.
 
மத்தியில் வேறாகவும் பிராந்தியத்தில் வேறாகவும் இரட்டை வேடம் போடும் தெளிவான கொள்கைசார் நிலைப்பாடுகளற்ற அரசியல் நாடகங்களை அரங்கேற்றுவதனை அரசியல் சூதாட்டமாகவே பார்க்க வேண்டும்.
 
தென்னிலங்கை முஸ்லிம்களைப் பொறுத்தவரை தற்போதைய களநிலவரங்கள் முற்றிலுமாக வேறுபட்டுள்ளதால் தேசிய அரசியல் கட்சிகளுடன் இணைந்து தமது தேர்தல் வியூகங்களை அந்தந்த மாகாணத்தில் வகுத்துக் கொள்தல் வேண்டும்.

மஸிஹுத்தீன் இனாமுல்லாஹ்

16.10.2021

எட்டாம் வகுப்பும் படியாது எம்மை எட்டும் வரை படிக்க வைத்த யுக புருஷர்!

யுக புருஷர் தந்த அந்த கல்லூரி ஹாஸ்டல் வாழ்க்கை..!

(ஜாமியாஹ் நளீமிய்யாஹ் ஸ்தாபகர் யுகபுருஷர் அல்ஹாஜ் நளீம் (ரஹிமஹுல்லாஹ்) அல்லாஹ்விடம் மீண்டு இன்றுடன் 16 வருடங்களாகின்றன, நினைவுகளை மீட்டி அன்னாரது மறுமை வாழ்வின் ஈடேற்றத்திற்காக என்னோடு என் உறவுகளும் துஆ செய்வீர்களென எதிர்பார்த்தவனாக இதனை மீள்பதிவு செய்கின்றேன்.)

மஸ்ஜிதில் லுஹர் தொழுது விட்டு டைனிங் ஹால் நோக்கி நடப்போம், சாப்பாட்டு மேசையில் எமது பிலேட்கள் தயாராக இருக்கும் இரண்டு மூன்று காய்கறிகள் மீன் இறைச்சி அல்லது முட்டையுடன் பகலுணவு தயாராக இருக்கும்.

வாரம் இருமுறை ஒரு சிறிய பாத்திரத்தில் தயிர் இருக்கும் ஒரிரு நாட்கள் ஒரு வாழைப் பழமிருக்கும்!

ஒரு கல்லூரியில் வசிக்கும் 300 மாணவர்களுக்கு மூவேளை உணவு மூன்று வேளை தேநீர் இலவசமாக தருவதென்பது இலகுவான காரியமா?

எனக்கு அந்த தயிர் என்றால் உயிர், வாழைப்பழமென்றால் வாழ்க்கை என்றிருக்கும்..!

வீட்டில் அவ்வப்போது அந்த இரண்டு வகைகளும் பழவகைகளும் வீட்டுத் தோட்டம் பண்ணையிலிருந்து அவ்வப்போது கிடைப்பதால் ஹாஸ்டலில் தான் அருமை பெருமை அதிகம் தெரிந்தது..

அந்த ஏழு வருட ஏக்கத்தின் தாக்கம் இன்னும் இருக்கிறது பழப்பிரியனாக கண்ட இடத்தில் வாங்கி வீட்டில் வைத்துக் கொள்வேன்..தயிரும் அவ்வாறே…

பிறந்தது முதல் பசி தாகம் தெரியாது வேளாவேளை உணவு தேநீர் பழங்கள் பானங்கள் தந்து, தொட்டில் முதல் கல்வியும் அறிவும் ஆன்மீகமும் தந்து வளர்த்து ஆளாக்கிய அதிபர் ஆசிரியர் உம்மா வாப்பாவிற்கு உயரிய சுவனத்தின் அருள்பாக்கியங்களை அள்ளித்தர அந்த வல்லோனை பிரார்திக்கும் ஒவ்வொரு வேளையும் அந்த அறிவுத் தந்தைக்கும் மன்றாடிப் பிரார்த்திக்கிறேன்.

7 வருட கற்கை 2 வருட கற்பித்தல் விடுமுறை நாட்கள் போக வருடம் 325 நாட்கள் என கூட்டிக் கழித்துப் பார்க்கிறேன் சுமார் 2925 நாட்கள்…

மூவேளை உணவு 8775 மூவேளை தேநீர் 8775…

இவ்வளவையும் இலவசமாக தந்த கல்வித் தந்தை..!

வதிவிடக் கற்கைகளுக்காக சகல வசதிகளுடனும் கூடிய ஹாஸ்டல்கள் சிரேஷ்ட மாணவர்களுக்கான விடுதியறைகள் கட்டில்கள் மெத்தைகள் தலையணைகள் காற்றாடிகள் மின்விளக்குகள் என அனைத்தையும் இலவசமாகவே தந்த கல்வித் தந்தை…

அல்லாஹ்வின் அளப்பரிய அருளால் அவனது கலாமை அவனது தூதரது ஸுன்னாஹ்வை அறபு மொழியை இஸ்லாமிய ஷரீஆவை கற்று இந்த மண்ணிலும் உலகெங்கிலும் அறப்பணி செய்ய உங்களிடம் எங்களைப் பாரப்படுத்தினானே!

நீங்கள் எத்தகைய அருள்பாக்கியம் பெற்ற மனிதராக மனிதருள் மாணிக்கமாக இருத்தல் வேண்டும்… நீங்கள் உலகறிந்த மாணிக்க கல் வியாபாரி மாணிக்க கல் வியாபாரிகளுக்கெல்லாம் முன்மாதிரி, மனிதர்களில் மாணிக்கங்களை காண கனவு கண்டீர்கள்..

நீங்கள் கண்டெடுத்து பட்டை தீட்டி சந்தைக்கு விட்ட விலைமதிக்க முடியாத பலவர்ணக் கற்களுக்குள் இந்த சாதாரண கல்லையும் உள்வாங்கி உருவாக்கிய உங்களுக்கு எவ்வாறு நன்றி சொல்வது அதை அந்த அல்லாஹ்விடமே பாரப்படுத்த மட்டுமே என்னால் முடியும்..

நீங்கள் எமது பட்டமளிப்பு விழா நிறைவில் அதே டைனிங் ஹாலில் தயாராக இருந்த விருந்து மண்டபத்தில் எழுந்து நின்று எதையோ சொல்ல முயற்சித்து மூன்று முறை அல்ஹம்து லில்லாஹ் சொன்னீர்கள்..

வார்த்தைகள் வரவில்லை அழுது விட்டீர்கள்.. நாங்களும் கண்கலங்கி விட்டோம்… பின்னர் சொன்னீர்கள்..

நான் பட்டமளிப்பு விழாவில் சொல்ல வேண்டியதை எல்லாம் சொல்லிவிட்டேன்.. ஆனால் ஒரு விஷயத்தை இப்போது சொல்ல ஆசைப்படுகிறேன்..

கோடானு கோடான வருடங்களுக்கு முன்னர் அல்லாஹ் இந்த உலகைப் படைத்தான், இலங்கை மண்ணில் இந்த இடத்தை படைத்தான் இதில் அவனது சன்மாரக்க கலையகத்தை உருவாக்க அவனது கழாவிலும் கதரிலும் நாடியிருந்தான்..

மீண்டும் அழுதீர்கள்..

அந்தக் கலையகத்தை கட்டியெழுப்ப இந்த ஏழை என் பெயரைக் குறித்து வைத்தானே…அந்த ரப்பிற்கு நாயனிற்கு நான் எவ்வாறு நன்றி சொல்வேன்… என்று கூறினீர்கள்…

உலகம் தோன்றும் போதே யுக புருஷர்கள் பெயர்களும் தோன்றியுள்ளன… பயனாளிகள் எங்கள் பெயர்களும் பட்டியலில் இருந்திருக்குமே..

உங்கள் கடமைகளை நீங்கள் செவ்வனே செய்துவிட்டு அல்லாஹ்விடம் மீண்டு விட்டீர்கள்…பயனாளிகள் நாம் செய்கிறோமா..? நினைக்கவே நெஞ்சம் படபடக்கிறது…!

உங்கள் கதை அன்று சொன்னீர்கள்… எட்டாம் வகுப்பு வரை படிக்க முடியவில்லை, எங்களை எட்டும் வரை படிக்க வைத்தீர்களே..!

உம்மா தென்னை மட்டைகளை ஊர வைத்து அதை தட்டி தும்புக் கயிறு திரித்து தறுவார்கள் நான் விற்று வருவேன்.., காலையில் அப்பம் சுட்டு தருவார்கள் நான் விற்று வருவேன்… அம்மிக்கல்லில் எஞ்சியிருக்கும் அரைத்த தேங்காய் சம்பலில் அப்பம் தொட்டு சாப்பிட்டதாக சொன்னீர்கள்..

வீடுகள் கட்டும் இடங்களுக்கு கையாளாக கற்களை சுமந்து செல்வேன்..! பசிபட்டிணி பழகிப்போன விவகாரம் என்றீர்கள்.. உங்கள் பிள்ளைகள் எங்களை பசி தாகம் உணராது பார்த்துக் கொண்டீர்கள்…!

உணவு,தேநீர்: இன்று பால்மா, எரிவாயு, பசளை தட்டுப்பாடு என மக்கள் அங்கலாய்க்கிறார்கள், வெளிநாட்டுச் செலாவணி நெருக்கடியாம், அன்று சிறிமாவோ அம்மையாரின் அரசிற்கு வெளிநாட்டுச் செலாவணி நெருக்கடி தீர்க்க நீங்கள் கைகொடுத்து வரலாற்றில் இடம்பிடித்தீர்கள்..!

எனக்கு ஏற்பட்ட நிலை என் சமூகத்திற்கு ஏற்பட்டு விடக்கூடாது என்று உங்கள் பிஞ்சு நெஞ்சில் கனவு கண்டீர்கள்… நாடாளவிய ரீதியில் கொடை வள்ளல் உங்கள் பெயர் ஒலித்தது..மஸ்ஜிதுகள் மத்ரஸாக்கள் என வாரிவழங்கினீர்கள்…

எமது அன்பிற்குரிய நளீம் ஹாஜியார் (ரஹிமஹுல்லாஹ்) அவர்களே..!

இஸ்லாமிய மறுமலர்ச்சி இயக்கம், ஜாமியாஹ் நளீமிய்யாஹ், இக்ரஃ தொழில் நுட்பக் கல்லூரி, இலங்கை முஸ்லிம்களது கீர்த்தி மிகு வரலாறு.. என இன்னும் உங்கள் இலட்சிய வாழ்வு நீடித்துக் கொண்டிருக்கிறது…!

நீங்கள் வபாஃத் ஆவதற்கு இரு வருடத்திற்கு முன்னர் என்னை ஒரு இராப்போசன விருந்திற்கு அழைத்தீர்கள்.. மேசை நிறைய விதவிதமான உணவுகள் இருந்தன..

இனாமுல்லாஹ், இதுவெல்லாம் ஹாஜியாருக்கு தயாரிக்கப்படும் பத்திய உணவுகள் அவற்றையே உங்களுக்கும் தயார் செய்யச் சொன்னேன் என்றீர்கள்… பின்னர் என்னிடம் நீங்கள் சில வசஸிய்யத்துகளை சொன்னீர்கள்.. (ஏற்கனவே எழுதியுள்ளேன்)

நீங்கள் சுகயீனமுற்றிருந்த நிலையில் என்னை அழைத்து விருந்து படைத்தமை எனது வாழ்நாளில் நான் பெற்ற அதி உன்னத கெளரமாகும்!

யா அல்லாஹ்!

நளீம் ஹாஜியாரையும் அவர்போல் இந்த மண்ணில் அறப்பணிகள் புரிந்த நன்மக்கள் பெரியார்கள் உலமாக்கள் கல்விமான்களையும், எமது பெற்றார்களையும் உனது அருள்கொண்டு அரவணைத்துக் கொள்வாயாக, அவர்களைப்போல் இன்றும் இனியும் தம்மாலியன்றதை சமூகத்திற்கும் தேசத்திற்கும் செய்யும், செய்ய எண்ணம் கொண்டிருக்கும் நன்மக்களது ஈருலக வாழ்விலும் நிறைவாக அருள் புரிவாயாக!

மஸிஹுத்தீன் இனாமுல்லாஹ்

10.08.2021

 

 

 

முஆத் இப்னு ஜபல் (ரழி) இறைதூதர் முஹம்மத் (ஸல்) அவர்களிடம் சுவனம் செல்ல வழி கேட்கிறார்கள்!

நபித் தோழர் முஆத் இப்னு ஜபல் (ரழி) இறுதி இறைதூதர் முஹம்மத் (ஸல்) அவர்களிடம், என்னை சுவனத்தில் கொண்டு சேர்க்கும் நல் அமல் ஒன்றை கற்றுத் தாருங்கள் என்று கேட்டார்கள்..!

சுவன வாழ்வை அடைவது அல்லாஹ் (அவனது அன்பை திருப்தியை வெல்வதில் ஆர்வமுள்ள தான்) நாடியவர்களுக்கன்றி இலகுவான காரியமல்ல அதற்கு அல்லாஹ்வின் அருள் வேண்டும் என கூறி விட்டு அதற்கான சில பிரதான தகைமைகளை சொல்கிறார்கள்:

நீ அல்லாஹ்விற்கு இணைவைக்காது வழிபட வேண்டும், தொழுகையை நிலைநிறுத்த வேண்டும், நோன்பை நோற்க வேண்டும், (வசதி வரின்) ஹஜ்ஜை நிறைவேற்ற வேண்டும். அவை இஸ்லாத்தின் அடிப்படை கடமைகள் ஆகும்.

அதற்கு மேலதிகமாக அபரிமிதமான நன்மைகளை அள்ளித்தரும் இறையன்பு அருகாமையை பெற்றுத் தரும் மற்றும் சில விடயங்களை சொல்லித் தருகிறார்கள்:

நோன்பு (தீமைகளில் இருந்து ஒரு விசுவாசியை காக்கும்) கேடயமாகும்.ஸதகா தான தர்மம் நீர் நெருப்பை அணைத்து விடுவது போல் பாவங்களை போக்கி விடுகிறது.இராத் தொழுகை (கியாமுல் லைல் – தஹஜ்ஜுத்) இறை நெருக்கத்தை ஏற்படுத்து கிறது என்று கூறி விட்டு ஸூரதுஸ் ஸஜ்தாவின் கீழ் காணும் வசனங்களை ஓதிக் காண்பிக்கிறார்கள்.

“அவர்களுடைய விலாக்களைப் படுக்கைகளிலிருந்து (தூக்கத்தைத் துறந்து) உயர்த்தி அவர்கள் தங்களுடைய இறைவனை அச்சத்தோடும் நம்பிக்கை ஆர்வத்தோடும் பிரார்த்தனை செய்வார்கள்; மேலும் நாம் அவர்களுக்கு அளித்ததிலிருந்து (தானதர்மங்களில்) செலவும் செய்வார்கள். அவர்கள் செய்த (நற்) கருமங்களுக்குக் கூலியாக மறைத்து வைக்கப்பட்டுள்ள கண் குளிர்ச்சியை (மறுமையின் பேரின்பத்தை) எந்த ஓர் ஆன்மாவும் அறிந்து கொள்ள முடியாது.” (ஸூரதுஸ் ஸஜ்தா 16:17)

பின்னர், உமக்கு நான் மூன்று முக்கிய விடயங்களை கூறுகின்றேன்:

வாழ்வில் தலையாய அடிப்படை அம்சம்!

அசைக்க முடியாத தூண்!

அனைத்திற்கும் உச்சம்!

முற்று முழுதாதாக அல்லாஹ்விற்கு அடிபணிந்த முஸ்லிமாக இருப்பது தான் தலையாய அடிப்படை அம்சம்!

ஐவேளை தொழுகைகளையும் நிலைநிறுத்துவது தான் (இஸ்லாமிய வாழ்வெனும் அழகிய கட்டடத்தின்) தூண்!

சத்தியத்தை நிலைபெறச் செய்து அசத்தியத்தை ஒழிக்க அயராது உழைக்கும் அறப்பணி “ஜிஹாத்” அவற்றின் உச்சமாகும்!

இவ்வாறு சுவனபதிக்கு இட்டுச் செல்லும் பர்ழான நபிலான, பிரதான மற்றும் பிரத்தியேகமான வழிமுறைகளை சொல்லித் தந்த இறைதூதர் (ஸல்) அவர்கள் இறுதியாக மற்றொரு எச்சரிக்கையை சொல்லித் தருகிறார்கள்.

முஆதே!

சொல்லப்பட்ட அனைத்து வழிமுறைகளையும் கட்டிக் காத்துக் கொள்கின்ற ஒரு விடயம் இருக்கிறது, அது தான் இது என நாவை இறைதூதர் (ஸல்) அவர்கள் காட்டினார்கள்!

நாம் பேசுகின்றவை குறித்தெல்லாம் வினவப்படுவோமா? யா ரஸூலல்லாஹ் என கேட்கவே, உமது தாய்க்கு நீர் இல்லாமல் போயிருத்தல் வேண்டும்…(இது ஆச்சரியத்தை வெளிப்படுத்த அன்றைய அறபு வழக்கில் இருந்த ஒரு பிரயோகம், நபியவர்கள் எவரையும் சபித்ததில்லை)

முஆதே! மனிதர்களை அதிகமாக நரகில் முகம்குப்புற தள்ளிவிடுவது நாவு ஏற்படுத்தும் தீ வினைகள் தவிர வேறதும் உண்டோ…?!

என நாவினை பேணி மனிதர்களை நோவினை செய்யாது வாழ்வதன் முக்கியத்துவத்தை எடுத்துக் கூறி எச்சரிக்கை விடுத்தார்கள் எமது உயிரிலும் மேலான தலைவர் இறைதூதர் (ஸல்) அவர்கள்.

(ஸுனன் திர்மிதி – ஸஹீஹ்/ஹஸன்)

சுவர்கத்திற்கு செல்வதற்கான வழிமுறைகளை சொல்லித் தந்த இறை தூதர் ஸல் அவர்கள், எல்லாத் தகைமைகளும் பெற்ற பின்பும் நாவினாலும் நடத்தையினாலும் பிறருக்கு தீங்கிழைப்பவர் எவ்வாறு சுவனம் செல்ல முடியும் என்ற எச்சரிக்கையையும் விடுத்துள்ளார்கள்.

பொய், புறம், கோல், அபாண்டம், அவதூறு சொல்தல், மானபங்கப் படுத்தல், இட்டுக்கட்டுதல், கேலி செய்தல், மனதை காயப்படுத்தும் பட்டப்பெயர்கள் சூட்டல், குதர்க்க வாதங்கள், உறவுகளை பிரிக்க சதி செய்தல், சூழ்ச்சிகள் செய்தல், பிணக்குகளை, சர்ச்சைகளை ஏற்படுத்தல், உணர்வுகளை காயப்படுத்தல், குரலை உயர்த்தி பேசுதல், திட்டுதல், சாபமிடுதல்… என பல விடயங்கள் பற்றி அல்குர்ஆனும் சுன்னாஹ்வும் எச்சரிக்கைகளை விடுத்துள்ளன. (தொடரும்)

மஸிஹுத்தீன் இனாமுல்லாஹ்

07.10.2021

 

வாழ்க்கைச் செலாவணி  சங்கிலித் தொடராக அதிகரித்துச் செல்லும் அபாயம்!

அரிசி, கோதுமை மா, சீனி, பால்மா, எரிவாயு விலையேற்றம் காரணமாக  சகல உணவு பான வகைகளினதும் விலை அதிகரிப்பது சாதாரண விடயமாகும்.

அதே போன்று எரிபொருள் விலைகள் அதிகரிக்கப்படும் பொழுது போக்கு வரத்து செலவினங்கள் மாத்திரமன்றி சந்தைப்படுத்தல் செலவினங்களும் அதனூடாக  பொருட்கள் சேவைகளின் விலைகளும் கட்டணங்களும்  அதிகரிக்கின்றன.

அவற்றோடு மக்கள் பொருட்கள் சேவைகளுக்காக நேரடியாகவும் மறைமுகமாகவும் செலுத்தும் வரிகளும்  அதிகரிக்கின்றன.

வாழ்க்கைச் செலாவணி அதிகரிக்கின்ற பொழுது தொழிலாளர் ஊழியர்கள் சிற்றூழியர்கள் என சம்பளம் கொடுப்பனவுகளும் அதிகரிக்கின்றன.

அரச தனியார் ஊழியர்கள் வாழ்க்கைச் செலாவணி உயர்வை கருத்தில் கொண்டு சம்பள உயர்வு போராட்டங்கள் நடத்தும் போது அரசு மீண்டும் வருவாயை அதிகரிக்க  பொருட்கள் பண்டங்களின் விலைகளில் கை வைப்பதை தவிர வேறு மார்க்கம் இல்லை என்பதால் மீண்டும் மக்கள் மீதான சுமை அதிகரிக்கிறது.

அரசு உள்நாட்டு வெளிநாட்டு கடன்களை பெறும் பொழுதும் மீளச் செலுத்தும் பொழுதும் பணவீக்கம் அதிகரிப்பதாலும்  பணத்தின் பெறுமதி குறைவதால் பண்டங்களின் சேவைகளின் கட்டணங்களும் விலைகளும் அதிகரிக்கின்றன.

அபிவிருத்தி நிதிகளை அமைச்சர்கள், பாராளுமன்ற உறுப்பினர்கள், மாகாண உள்ளூராட்சி உறுப்பினர்கள், அரச அதிபர்கள், கொந்தராத்துக் காரர்கள் என பல தரப்பட்டோர் கையாடுவதால் ஏற்படுகின்ற நேரடி மறைமுக உடனடி நீண்ட கால இழப்புக்கள்  பொருட்கள்  சேவைகளின் விலையேற்றத்தில் வரிவிதிப்புகளில் முடிவடைகின்றன.

அதே போன்று தேசத்தின் தேவைக்கு மிஞ்சிய அமைச்சர்கள், பாராளுமன்ற உறுப்பினர்கள், வெள்ளை யானை எனப்படும் மாகாண சபை உறுப்பினர்கள், இரட்டிப்பாக்கப்பட்டுள்ள  ஊராட்சி நகராட்சி உறுப்பினர்கள் அவர்களுக்கான சம்பளங்கள் சலுகைகள் கொடுப்பனவுகள் என சகல செலவினங்களும் மக்களது வயிற்றில் அடிக்கின்றன.

அரசாங்கம் செல்வாக்கு இழக்கின்ற பொழுது அபிவிருத்தி நிதியென்ற பெயரில் உயர்மட்டம்  முதல் அடிமட்டம் வரை  அதிகாரத்தில் உள்ள மக்கள் பிரதிநிதிகளூடாக அடிமட்ட  அடியாட்கள் வரை சென்றடைய  பட்ஜட் மூலம்  ஒதுக்கப்படும்  பல்லாயிரம்  கோடி  நிதியும்  பொருட்கள் பண்டங்களினூடாகவும்  முதலாளி இடைத்தரகர் மாஃபியாக்களூடாகவுமே  திரட்டப்படுகின்றன.

வாழ்க்கைச் செலாவணி  அதிகரிப்பு தொடர்பான விழிப்புணர்வு பொதுமக்கள் மத்தியில் போதுதாமல் இருப்பதனால்  ஒருங்கிணைந்த போராட்டங்கள்  இல்லாமல்  போயிருக்கிறது.

இலங்கையில் மக்கள் போராட்டம் என்றால் அரசியல் மயமாகும் தொழிற்சங்கங்களின் அரச உத்தியோகத்தர்களின் போராட்டங்கள் மட்டும் தான், ஆனால் பெரும்பான்மையான மக்கள் தொகையை பாதிக்கும் வாழ்க்கைச் செலாவணி சார் போராட்டங்கள் நடத்தப்படுவதில்லை, சந்தர்ப்பவாத அரசியல் வியாபாரிகளும் விலைபோய்விடுகின்றனர்.

சந்தையில் கேள்வி நிரம்பலை நுகர்வோர் தீர்மானிப்பதன் மூலம்  விலைகளை ஒரு சில மாதங்களில் குறைக்க முடியும்.

பால்மா தட்டுப்பாடு ஏற்பட்ட காலத்தில் கடைப்பிடித்த  மாற்று வழிகளை இயன்றவரை தொடர்வதன் மூலம் சந்தையில் அதற்கான கேள்வியை குறைக்க முடியும்.

கிராமப்புறங்களில் ஆட்டுப்பால் பசும்பால் பாவனையை அதிகரிப்பதன் மூலம் பால்மா எனும் பெயரில் விற்கப்படும் இரசாயன மற்றும் செயற்கை புரதங்கள்  சேர்க்கப்பட்ட சக்கை நிறமூட்டி மாவின் தேவையை குறைக்க முடியும்.

தாய்ப்பாலின் பின்னர் குழந்தைகளுக்கு அங்கர் பால் எனும் மாயையிலிருந்து தாய்மாரின் மனநிலை மாற்றத்தை ஏற்படுத்தி பதிலீடுகளில் கவனம் செலுத்துதல் ஆரோக்கியமானது.

இடைத்தரகர்களின் அரிசி மாஃபியாவில் இருந்து விடுதலை பெற சிறிய அரிசி ஆலை உரிமையாளர்களிடமிருந்து கொள்வனவு  சந்தைப்படுத்தல் வலையமைப்பை  ஏற்படுத்த  புதிய தொழில் முனைவர்கள் முன்வர வேண்டும்.

எரிவாயு பாவனையை பாதியளவிலாவது குறைப்பதற்கு இயன்றவரை முயற்சிக்க வேண்டும், தட்டுப்பாடு இருந்த காலகட்டத்தில் கடைப்பிடித்த  சிக்கனமான  அணுகு முறைகளை  தக்கவைத்துக் கொள்வது நல்லது.

மண் எண்ணை அடுப்பு, கிராமங்களில் விறகு, உமி அடுப்பு என்பவற்றை பயன்படுத்துவதன் மூலம்  குறுகிய காலத்தில் எரிவாயு விலையை குறையச்செய்ய  முடியும்.

நகர்புறங்களில் ஒரே சமையலின் பொழுது வெளியேறும் கொதிநீராவியின் மூலம் பாதியளவு காய்கறிவகைகளை பதப்படுத்தி விட்டு சமைக்கும் முறைகளை கையாள வேண்டும்.

இளைஞர்கள் தமக்கு முடியுமான பிரதேசங்களில் இயற்கை எரிவாயு உற்பத்தி பயன்பாட்டை  கண்டறிந்து தொழில் முயற்சிகளை மேற்கொள்ள முடியும்.

சூரிய சக்தி பயன்பாட்டை அதிகரிப்பது காலத்தின் கட்டாயமாக மாறிவருகிறது.

பொதுவாக அத்தியாவசிய தேவைகளோடு சில பண்டங்களின் பாவனைகளை மட்டுப்படுத்திக்  கொள்வதும் வாழ்க்கைச்  செலாவணி உயர்வை கருத்தில்  கொண்டு சிக்கனத்தை  கடைப்பிடிப்பதும் விரயங்களை  தவிர்ப்பதும்  கட்டாயமாகும்.

மஸிஹுத்தீன்  இனாமுல்லாஹ்

12.10.2021

ஹராமிகளை ஆதரிக்கவோ அங்கீகரிக்கவோ வேண்டாம்!

“ஹராமி” என்றால் தடுக்கப்பட்ட தீய கருமங்களை, ஹராமானவற்றை செய்பவன் “ஹராமிய்யாஹ்” என்றால் ஹராமானவற்றை செய்பவள், கள்வர்களுக்கும் அதாவது திருடர்களுக்கும் அந்த நாமம் சூட்டப்படுகிறது.
உண்மையில் அல்குர்ஆனோ, சுன்னாஹ்வோ இவ்வாறு எவரையும் குறிப்பிட்டதில்லை, பாவங்களை பகிரங்கமாக செய்வோரை பாஃஸித், பாஃஜிர்கள், பாஃஸிக்கு கள் என குறிப்பிட்டுள்ளன, ஆனால் அறபு வழக்காற்றில் தான் இவ்வாறு ஒரு பிரயோகம் இருக்கிறது.
ஒரு தவறை பிழையை செய்த ஒருவரை கண்டிப்பதற்காக கோபத்தில் தூற்றுவதற்காக திட்டுவதற்காக ஹராமி என சர்வசாதாரணமாக அழைப்பது தடுக்கப்பட்டுள்ள விடயமாகும். அதே போன்று பகிரங்கமாக பூமியில் ஹராமான தடுக்கப்பட்ட பாவங்களை செய்து திரிபவர்கள் அடாவடிகள் புரிவோரை ஹராமிகள் என அழைப்பர்.
பொய், களவு, வஞ்சனை, கொலை, கொள்ளை புரிவோர், ஏமாற்று பேர்வழிகள் ஹராமிகள் ஆவர், அதே போன்று மது மாது தகாத உறவுகள் என துர்நடத்தைகள் உடையோரும் ஹராமிகள் ஆவர்.
ஆகுமான அனுமதிக்கப்பட்ட வழிகளில் ஹலாலாக உழைத்து ஹலாலாக வாழ்வதே ஒரு விசுவாசியின் பண்பாகும், உண்மை, நீதி, நேர்மை, தூய்மை, அறம், தர்மம் என உயரிய குணாதிசயங்கள் உண்மை விசுவாசத்தின் வெளிப்பாடுகளாகும், ஆனால் “ஹலாலிகள்” என எவரும் போற்றப்படுவில்லை.
இஸ்லாத்தில் கொஞ்சம் பொய், கொஞ்சம் களவு, கொஞ்சம் ஓர வஞ்சனை, கொஞ்சம் நோவினை, கொஞ்சம் அநீதி, கொஞ்சம் ஷைத்தானிய பண்புகள், கொஞ்சம் மது, கொஞ்சம் மாது என எதுவும் கிடையாது, அதில் பூரணமாகவே நுழைதல் வேண்டும்.
அதே போன்று தாம் நல்லவர்களாக உண்மை நேர்மை நீதி நியாயம் பேணுபவர்களாக இருந்து விட்டால் போதாது, நன்மையை ஏவுதலும் தீமையை தடுத்தலும் ஒரு உண்மை விசுவாசியின் கட்டாய கடமையுமாகும்.
ஒரு தீமையை கையால் தடுப்பது, வாயால் தடுப்பது, முடியாது போனால் மனதால் வெறுத்து ஒதுங்கி நிற்பது தீமைகளை தடுக்கும் படிமுறைகளாகும். நன்மைகள் செய்பவரை பாராட்டுவது, ஆதரிப்பது அவர்களோடு ஒத்துழைப்பது சேர்ந்து வாழ்வது எவ்வாறு நன்மைகளை நேசிக்கின்ற பண்பாக இருக்கின்றதோ அவ்வாறே தீயோரை திருத்துவதும் திருந்தாவிடின் அவர்களது சசகவாசத்தை தவிர்ப்பதும் தீமைகளை வெறுக்கின்ற தடுக்கின்ற குறைந்த ஈமானிய பண்பாகும்.
(திருடன்/திருடர்) பொதுவாக ஒரு கோழியை திருடியவனை திருடன் “ஹராமி” என்று பட்டம் சூட்டி ஒதுக்கி வைக்கும் நாம் கோடிகளை திருடும் பக்காத் திருடர்களை அதிவிஷேட பிரமுகர்களாக வாழ்த்தி வரவேற்று தோள்கள் மேல் சுமந்து திரிகிறோம், அவர்கள் அருகாமைக்காக ஏங்குகிறோம், அவர்களுடன் பல் இழித்து படம் எடுத்துக் கொள்கிறோம் என்றால் எமது ஈமானிய பண்புகளை நாம் பரிசீலனை செய்து கொள்ள வேண்டும்.
அரச சார்பற்ற தொண்டர் நிறுவனங்கள், நண்கொடைகள் வக்பு சொத்துக்களில் வயிறு வளர்ப்பவர்கள், மோசடி புரிபவர்கள், அரசியலில் ஊழல் மோசடி செய்து செல்வம் திரட்டும் பகற்கொள்ளைக் காரர்கள், சமூகத்தை சமயத்தை விற்று வயிறு வளர்ப்பவர்கள், சமூகத் தேசத் துரோகிகள் மாத்திரமல்ல.. வர்த்தகத்தில் மோசடிகள் புரியும் பக்காத் திருடர்கள் ஏமாற்றுப் பேர்வழிகள், ஹராமான வழிகளில் உழைப்போர் அவர்கள் செல்வம் செல்வாக்கு அதிகாரம் அந்தஸ்துகளில் இருந்தாலும் ஹராமிகளே!
மேற்படி ஹராமிகளின் செல்வம் செல்வாக்கு பணம் அதிகாரம் அந்தஸ்த்து ஆகியன சமூக நலன்களுக்கு பெறப்படுவதும் அவர்களுக்கு வழங்கும் அங்கீகாரமாகும், அல்லாஹ் தூய்மையானவன் அவன் தூய்மையானவற்றை மாத்திரமே அங்கீகரிக்கின்றான்.
ஹராமிகளை அங்கீகரிப்பது ஊக்குவிப்பது வரவேற்பது ஆதரிப்பது அவர்களுக்கு ஆதரவு திரட்டுவது, பதவிகளில் அமர்த்துவது எல்லாமே எந்த வகையிலும் குறைவில்லாது எம்மையும் பாவத்தின் பங்காளர்களாகவே மாற்றிவிடும்.
மனிதர்கள் சிலரைக் கொண்டு சிலரை அல்லாஹ் தடுக்காவிட்டால் பூமியில் பஸாதுகள் முறைகேடுகள் அதிகரித்துவிடும் என்பது இறைமறை கற்றுத்தரும் பாடங்களாகும்.
மஸிஹுத்தீன் இனாமுல்லாஹ்
06.10.2021

முஸ்லிம் சமூகம் எதிர் கொள்ளும் சவால்களுக்கு பின்னால் உள்ள அரசியலும், எரிகிற நெருப்பில் எண்ணெய் வார்க்கும் எமது அரசியலும்.

முஸ்லிம் சமூகம் எதிர் கொள்ளும் சவால்களுக்கு பின்னால் உள்ள அரசியலும், எரிகிற நெருப்பில் எண்ணெய் வார்க்கும் எமது அரசியலும்.

இஸ்லாத்திற்கும் முஸ்லிம்களுக்கும் எதிராக கட்விழ்த்து விடப்படுகின்ற காழ்ப்புணர்வு பரப்புரைகள், வன்முறைகள், அநீதிகள் அராஜகங்களுக்கு பின்னால் தேசிய பிராந்திய, பூகோல அரசியல் பொருளாதார இராணுவ இராஜதந்திர மூலோபாயங்களே இருக்கின்றன.

துரதிட்டவசமாக களத்தில் நின்று சவால்களின் வகையறிந்து முகம் கொடுப்பதற்கு தேவைப்படும் பிரதான உத்திகளும் யுக்திகளும் சாதனங்களும், நிபுனத்துவங்களும், ஆள் பொருள் வளங்களும் இல்லாத ஒரு கையாலாகாத சமூகமாகவே நாம் இருக்கின்றோம்.

பரப்புரைகளுக்கு பதில் அறிக்கைகள் விடுவதும், வன்முறைகளுக்கு கண்டன அறிக்கைகள் விடுவதும், அவசர சந்திப்புக்கள், திடீர் விஜயங்கள் என ஆளாய் பறப்பதும் அவ்வப்போது எதிர்வினையாற்றுவதும் அவற்றிற்கு சமூக ஊடகங்களில் விளம்பரம் கொடுப்பதும் மாமூலான நடவடிக்கைகள் ஆகிவிட்டன.

போராட்ட யுக்திகள் அறியாது உஷார் மடையர்களாக எதிர்வினையாற்றும் சமூகமாக இருப்பதனால் எதிரிகளின் சதிவலைகளில் தாமாகவே சென்று சிக்கித் தவிக்கும் நிலைதான் இன்று எமக்கு ஏற்பட்டுள்ளது என்று சொன்னாலும் மிகையாகாது.

மேற்படி சவால்களை எதிர்கொள்ள ஒரு சிறுபான்மைச் சமுகமாக உடனடி, இடைக்கால நீண்ட கால அரசியல் இராஜதந்திர மூலோபாய நகர்வுகளை திட்டமிட்டு தெளிவான தேசிய நிகழ்ச்சி நிரலில் சமூகத்தை வழிநடாத்தும் கடமையிலிருந்து எமது சிவில் சன்மார்க்க அரசியல் தலைமைகள் தவறியுள்ளன.

எமது சமூக உள்ளக அரசியலை எவ்வாறு கையாள்வது, ஏனைய சமூகங்களுடனான பிராந்திய தேசிய அரசியலை எவ்வாறு கையாள்வது, ஒரு தேசமாக புவி அரசியலை எத்தகைய பரிமாணங்களில் கையாள்வது என எத்தகைய அறிவும் சாணக்கியமும் சாமர்த்தியமும் பிரக்ஞையும் இல்லாத மொத்த மற்றும் சில்லறை அரசியல் வியாபாரத்தையே நாம் செய்து கொண்டிருக்கிறோம்.

குறிப்பாக கடந்த மூன்று தசாப்த கால முஸ்லிம் தனித்துவ அடையாள அரசியல் எரிகிற வீட்டில் பிடுங்குகிற அல்லது கலங்கிய குட்டையில் மீன்பிடிக்கின்ற தேசிய அரசியலையும் எரிகிற நெருப்பில் எண்ணெய் வார்க்கின்ற சமூக அரசியலையுமே செய்துவந்திருப்பதனை நாம் இன்று அனுபவித்துக் கொண்டிருக்கும் பின்விளைவுகள் உணர்த்திக் கொண்டிருக்கின்றன.

ஊழல் மோசடியின், வங்குரோத்தின் உச்சகட்ட அரசியல் கலாசாரத்தை உள்வீட்டில் சந்தைப்படுத்தி போராட்ட அரசியலை சோரம் போகும் சரணாகதி சூதாட்ட அரசியலாக்கிய வரலாற்றுப் பெயரும் பெருமையும் நம் சமுதாய குட்டி சுல்தான்களையே சாரும்.

முஸ்லிம் சமுகத்தின் இருப்பு பாதுகாப்பு அடிப்படை உரிமைகள், சமய கலாசார தனித்துவங்கள் மாத்திரமன்றி தேசத்தின் சுயாதிபத்தியம், ஐக்கியம், அரசியல் ஸ்திரத்தன்மை, பொருளாதார அபிவிருத்தி என சகல துறைகளிலும் பங்களிப்புச் செய்வது எமது தார்மீக பொறுப்பு கடைம என்பதனை உணராத அறிஜீவிகளை கொண்ட மலட்டுச் சமூகமாக நாம் இருக்கின்றோம்.

எமது தொழுகை, நோன்பு, ஸக்காத்து, ஹஜ்ஜு மற்றும் பர்ழு ஐன் பர்ழு கிபாயா கடமைகள் போல் சமூக தேசிய வாழ்வில் ஒரு உம்மத்தாக எமது அறப்(போராட்டம்)பணி எதுவென அறியாத அல்லது அறிந்தும் உணர மறுக்கின்ற கடமை பொறுப்புணர்வற்ற ஏட்டுச் சுரைக்காய் சமூகமாக நாம் காலத்தை கடத்திக் கொண்டிருக்கின்றோம்.

தலைமுறை இடைவெளியை விசாலமாக்கி புதிய தலைமுறைகளுக்கு வழிவிடாது சூதாட்ட அரசியலில் ஏகபோகம் கொண்டாடும் எதேச்சதிகார ஏமாற்றுப் பேர்வழிகளிடம் இருந்து அரசியல் அமானிதத்தை மீட்டு உரியவர்களிடம் ஒப்படைக்கும் வரலாற்றுக் கடமையிலிருந்து ஒவ்வொரு தேர்தலின் போதும் ஒரு சமூகத்தவராகவும் தேசத்தவராகவும் நாம் தவறி விடுகின்றோம்.

இனியும் இந்நிலை தொடர அனுமதிக்க முடியாது எதிர்வரும் மாகாண சபைத் தேர்தல்கள் அதைத் தொடர்ந்து வரும் உள்ளூராட்சி மன்றங்களுக்கான தேர்தல்களில் விழுமிய அரசியலில் ஆர்வமும் அர்ப்பணிப்பும் உள்ள இளம் தலைவர்கள் களமிறங்கி வரலாறு படைக்க முன்வரவேண்டும்!

இன்ஷா அல்லாஹ்.

மஸிஹுத்தீன் இனாமுல்லாஹ் (11.10.2921)

இறுதி இறைதூதர் முஹம்மத் (ஸல்) முழு மனித குலத்திற்குமான கருணையின் தூதராவார்!

சத்தியத்திற்கும் அசத்தியத்திற்கும், தர்மத்திற்கும் அதர்மத்திற்கும் இடையிலான (பிரபஞ்ச நியதியிலுள்ள நிலையான) சமர் அன்றி வேறு ஒரு சமர் இஸ்லாத்தில் இல்லை!

நபியே! உங்களை முழு மனிதகுலத்திற்கும் கருணையின் தூதராகவே (ரஹ்மத்) ஆகவே நாம் அனுப்பிவைத்தோம்!

அருள் கொடை என சுருக்கமாக மொழியாக்கம் செய்யப்பட்டிருந்தாலும் “ரஹ்மத்” என்றால் கருணை அன்பு பாசம் நேசம் என பரந்துபட்ட ஒரு கருத்தை கொண்டுள்ளது! எல்லாம் வல்ல அல்லாஹ் ரஹீம், ரஹ்மான் என்ற இரண்டு பிரதான பன்புகளைக் கொண்டுள்ளான், அனைத்துப் படைப்பினங்கள் மீதும் அபரிமிதமான அன்பை கருணையை கொண்டுள்ளதால் அவன் “ரஹ்மான்” ஆகவும், விசுவாசிகள், நல்லடியார்கள் மீது தனிப்பட்ட கருணையை கொண்டுள்ளதால் “ரஹீம்” ஆகவும் அழைக்கப்படுவதாக தப்ஸீர் ஆசிரியர்கள் விளக்கம் சொல்கிறார்கள்.

அல்குர்ஆனின் அனைத்து ஸூராக்களையும், பகுதிகளையும் பிஸ்மில்லாஹிர் ரஹ்மானிர் ரஹீம் என்ற திரு நாமம் கொண்டு ஆரம்பம் செய்யும் படி கட்டளையிட்டுள்ள அல்லாஹ் அனைத்துக் கருமங்களையும் அதே நாமம் கொண்டே ஆரம்பம் செய்யுமாறும் உபதேசம் செய்கிறான்.

மனித வர்க்கத்திற்கான கருணையின் தூது அவர்களது உலக வாழ்வில் அன்பையும் அறத்தையும் அமைதி சமாதானத்தையும் போதிக்கும் அதேவேளை நிலையான மறுமை வாழ்விலும் அவர்களுக்கு விமோசனத்தை தருவதையே பிரதான இலக்காக கொண்டுள்ளது.

அன்பையும் அறத்தையும் அமைதி சமாதானத்தையும் சமத்துவத்தையும் சகவாழ்வையும் தன் வாக்காலும் வாழ்வாழும் வலியுறுத்தி வாழ்ந்து காட்டிய கருணையின் தூதர் “உயர்ந்த மானுட பண்புகளை பூரணப்படுத்தவே தான் அனுப்பப் பட்டுள்ளேன்” என்றார்கள்.

அத்தகைய வாழ்வு நெறி இஸ்லாம் எனவும் அதனை ஏற்று வாழ்வோர் முஸ்லிம்களாகவும் அழைக்கப்படுவதிலும் ஒரு செய்தி இருக்கிறது, அசத்தியம், அநீதி அக்கிரமங்களுக்கும் அடக்குமுறைகளுக்கும் ஆளாகும் மனித குலம் இழந்து தவிக்கும் அமைதி சமாதானத்தை நிலைநிறுத்தி “ஸலாம்” எனும் சாந்தி சமாதானத்தை நிலைநிறுத்துவதும் மனித குலத்திற்கான கருணைத் தூதின் பிரதான பணியாகும்.

தனது நாவினாலும் நடத்தையாலும் பிறருக்கு தீங்கிழைக்காதவரே முஸ்லிம் ஆக இருக்க முடியும் என கருணையின் தூதர் ஸல் அவர்கள் கூறியுள்ளார்கள்.

“நபியே நிச்சயமாக நீங்கள் உயரிய பண்புகளைக் கொண்டுள்ளீர்கள்” நீங்கள் பண்பு ஒழுக்கமில்லா கடின சித்தம் கொண்டவராக இருந்திருந்தால் உங்களை விட்டும் அவர்கள் விலகிச் சென்றிருப்பார்கள்” என்றெல்லாம் இறை தூதர் (ஸல்) அவர்களது குணாதிசயங்கள் குறித்து கூறும் அல்குர்ஆன் “நிச்சயமாக இறைதூதரில் உங்களுக்கு சிறந்த முன்மாதிரி இருக்கின்றது” என விசுவாசிகளுக்கு உபதேசம் செய்கிறது.

ஒருவருக்கொருவர் “ஸலாம்” சொல்லிக் கொள்வதன் மூலம் ஒவ்வொரு தனியாளும் அமைதியை சமாதானத்தை தமக்குள் போதித்துக் கொள்ளுமாறு கட்டளையிட்ட கருணையின் தூதர் அன்பு அறம் சார் நெறிகளற்றோர் தம்மைச் சார்ந்தவரல்லர் என எச்சரிக்கையும் விடுத்துள்ளார்கள்.

ஒருவரது உடல் பொருள் மானம் அனைத்துமே அடுத்தவருக்கு ஹராமானவை தீண்டத் தகாதவை, ஒருவரது உயிரை கொல்வது முழு மனித வர்க்கத்தையும் அழிப்பதற்கு சமனாகும், அதேபோன்று ஒரு உயிரை வாழ்விப்பது முழு மனித வர்க்கத்தையும் வாழ வைப்பதற்கு சமனாகும்!

இஸ்லாம் எனும் பரிபூரணமான வாழ்வு நெறியை பலவந்தமாக திணிக்குமாறோ, வன்முறைகள் கொண்டு பரப்புமாரோ அல்லாஹ்வோ அவனது தூதரோ கட்டளையிட்டதில்லை, மாறாக அறிவுபூர்வமாக, நல்லுபதேசங்கள் மூலமும், அழகிய பிரயோகங்களைக் கொண்ட கருத்தாடல்கள்மூலமும் அல்லாஹ்வின் அறநெறியின் பால் அழைக்குமாறே அன்பு நபி முஹம்மத் (ஸல்) அவர்களுக்கு கட்டளை பிறப்பிக்கப் பட்டது.

தர்மம் அதர்மம், சத்தியம் அசத்தியம், நீதி அநீதி என்பவற்றிற்கிடையிலான தொடர்ந்தேர்சியான சமர் பிரபஞ்ச நியதிகளுடன் தொடர்புடைய நிலையான சமராகும், அது ஒரு இறைதூதரின் வாழ்வுடன் மட்டுப்படுவதில்லை, ஆதம் ஹவ்வா உலகிற்கு வந்ததது முதல் அனைத்து இறை தூதர்களும் சத்திய வழி நின்றவர்களும் தீய சக்திகளால் சவாலுக்கு உற்படுத்தப் பட்டனர்.

அதே தொடரில் தான் இன்றும் இஸ்லாமும் இறைதூதரும் அல்குரானும், ஷரீஆவும், முஸ்லிம்களும் சவாலுக்கு உற்படுத்தப் படுகின்றனர், அநீதி அக்கிரமங்கள் அராஜகங்களை அரங்கேற்றும் தீய சக்திகளின் மேலாதிக்கத்திலிருந்து மனித குலத்திற்கு விடிவையும் விமோசனத்தையும் பெற்றுத்தருகிற கருணையின் தூதினை சுமந்துள்ள ஒரு சமுதாயம் கைர உம்மத் ஆக சிறந்த சமுதாயமாக இறைவனால் போற்றப்படுகிறது.

ஆட்சி அதிகாரங்களுக்காக மேலாதிக்கம் செலுத்தும், அக்கிரமம் அராஜகம் புரியும் சக்திகளால் சத்தியத்தின் பேரொளியை வாயினால் அணைத்துவிட முடியாது, கருணையின் தூதர் முஹம்மத் (ஸல்) ஆட்சி அதிகாரங்களை விரும்பிய மன்னராக அன்றி கடைக்கோடி மனிதராகவே எளிமையாக வாழ்ந்து காட்டினார்கள்.

நிச்சயமாக சத்தியம் மிகைத்து அசத்தியம் அழிந்தே தீரும், ஆக்கிரமிக்கப் படும் பூமிகளிலும், அக்கிரமக் காரர்கள் ஆட்சி புரியும் பூமிகளிலும் ஆரவாரமின்றி சத்தியத்தின் பேரொளி ஒளிவிட்டுப் பிரகாசிக்கவே செய்யும், கருணையின் தூது மனித மனங்களில் ஊடுருவி ஆட்சி புரியும், அதுவே பிரபஞ்ச நியதியுமாகும்!

மஸிஹுத்தீன் இனாமுல்லாஹ்  (10.10.2021)

இறுதி இறைதூதர் முஹம்மத் (ஸல்) தான் ஒரு மன்னராகவோ செல்வந்தராகவோ வாழ்வதனை ஏன் விரும்பவில்லை?  

ஒரு முறை இறைதூதர் முஹம்மத் (ஸல்) அவர்களுடன் வானவர் தலைவர் ஜிப்ரயீல் (அலை) அமர்ந்திருக்கின்ற நிலையில் மற்றொரு வானவர் வருகை தருகின்றார். ஆச்சரியமாக அவரைப்பார்த்த இறைதூதர் (ஸல்) அவர்களிடம் ஜிபரயீல் (அலை) அவர்கள், படைக்கப்பட்டதற்கு பின்னர் இதுவே இந்த வானவர் முதன் முறையாக உலகிற்கு அனுப்பப் பட்டுள்ளார், அல்லாஹ்விடமிருந்து பிரத்தியேகமான ஒரு செய்தியை கொண்டுவந்துள்ளார், நீங்கள் உமது இரக்ஷகனுடன் பணிவாக நடந்து கொள்ளுங்கள் என ஆலோசனை கூறுகிறார்கள்.

வருகை தந்த வானவர் இறைதூதரைப் பார்த்த்து ஒரு மன்னராகவும் நபியாகவும் இருக்க விரும்புகிறீர்களா அல்லது ஒரு சாதாரண அடியாராகவும் நபியாகவும் இருக்க விரும்புகிறீர்களா? என கேட்கிறார்கள். உடனே இறைதூதர் (ஸல்) அவர்கள் தான் ஒரு சாதாரண அடியாராகவும் நபியாகவும் இருக்கவே விரும்புவதாக கூறிவிடுகிறார்கள்.

ஆட்சியை அதிகாரத்தை செல்வங்களை அவர்கள் நிலையற்ற இம்மை வாழ்விற்கான சாதனங்களாக சுகபோகங்களாக (சோதனைகளாக) பார்த்த இறைதூதர் (ஸல்) அவர்கள் நிரந்தரமான மறுமை வாழ்வின் சுகபோகங்களையே தேர்ந்தெடுக்கின்றார்கள்.

ஒரு முறை உமர் ரழி அவர்கள் இறைதூதர் (ஸல்) அவர்களைக் காண வருகிறார்கள், தனது வீட்டிற்குள் தரையில் ஈச்சம் ஓலைகளால் வேயப்பட்ட ஒரு பாயில் படுத்திருந்த முஹம்மத் ஸல் எழுந்திருக்கிறார்கள் அவரது மேனியில் ஓலைகளின் அடையாலம் பதிந்திருக்கிறது, தோலினால் செய்யப்பட்டு காய்ந்த சருகு புற்களால் நிரப்பப் பட்ட தலையணை காணப்பட்டது, வீட்டின் சுவற்றில் தோல்கள் கொழுகப்பட்டிருந்தன, வீட்டினுள் தோலை பதப்படுத்துவற்கான குர்ழ் எனும் ஒருவகை இலைகள் குவிக்கப் பட்டிருந்தன..

அல்லாஹ்வின் தூதரே நீங்கள் தரையில் பாயில் படுத்திருக்க உரோம பாரசீக மன்னர்கள் கைஸரும் கிஸ்ராவும் எந்த நிலையில் இருக்கிறார்கள் என உமர் ரழி வினவ, அவர்களுக்கு துன்யாவும் எமக்கு ஆகிராவும் தரப்பட்டிருக்கிறது என இறைதூதர் (ஸல்) பதிலளித்தார்கள்.

இதே கேள்வி விசுவாசிகளின் உள்ளத்தில் ஏற்படுவது இயல்பானதே, பிரபஞ்சம், உலகம் வாழ்வு மரணம் இம்மை மறுமை போன்ற இன்னோரன்ன விடயங்களை ஒரு விசுவாசி எவ்வாறு பார்க்க வேண்டும் என்பதற்கான முன் உதாரணமாகவே இறைதூதர் ஸல் அவர்கள் தனது வாக்கையும் வாழ்வையும் அமைத்துக் கொண்டார்கள் அதுவே அல்லாஹ்வின் நாட்டமாகவும இருந்தது.

இறைதூதர் ஸல் அவர்கள் ஒரு துறவியாகவோ சந்நியாசியாகவோ துன்யா வாழ்வைத் துறந்தவர்களாகவோ இருக்கிவில்லை அவர் அன்றைய சமூகத்தில் இருந்த வாழ்வாதார தொழில்களை வர்த்தக நடவடிக்கைகளை மேற்கொள்கிற ஒரு மனிதராகவே இருந்தார்கள். ஷாம்தேசத்திற்கும் ஏனைய தேசங்களிற்கும் அரேபிய தீபகற்பத்தினூடாக செல்கிற வணிக கரவான்கள் மக்கா மதீனா போன்ற பல நகரங்களை வர்த்தக மையங்களாக கொண்டிருந்தன.

நுபுவ்வத்திற்கு முன்பிருந்தே அத்தகைய கரவான்களில் பயணித்து வியாபார நடவடிக்கைகளில் ஈடுபட்ட இறைதூதர் ஸல் அவர்கள் கதீஜா நாயகியின் வாணிப நடவடிக்கைகளை பொறுப்பேற்று செய்தார்கள் திருமணத்திற்கு பின்னரும் தொடர்ந்து நுபுவ்வத்திற்குப் பின்னரும் அவரது வர்த்தக நடவடிக்கைகள் தொடர்ந்தன.

அதே போன்றே அன்றைய நபித் தோழர்களும் அன்றாடம் உழைப்பவர்களாகவே இருந்தார்கள், மிகப்பெரும் தனவந்தர்களும் இருந்தார்கள், ஜும்மாஹ் தினங்களில் கூட தொழுகைக்காக அழைக்கபாபட்டால் வியாபார நடவடிக்கைகளை நிறுத்துமாறும் தொழுகை நிறைவுற்றவுடனேயே புறப்பட்டுச் சென்று அல்லாஹ் அருளியுள்ள செல்வங்களை திரட்டிக் கொள்ளுமாறே அல்குர்ஆன் கற்றுத் தருகிறது.

செல்வத்தை முறையாக திரட்டுதல் முறையாக கையாளுதல் முறையாக நிர்வகித்தல் முறையாக செலவு செய்தல் போன்ற அனைத்து விடயங்களும் அல்குர்ஆன் சுன்னா மூலம் எமக்கு கற்றுத் தரப்பட்டிருக்கின்றன, உலகிலேயே அறிமுகமான முதன்மையான நீதியான நேர்மையான பொருளாதார நிதியியல் சித்தாந்தங்களை இறைதூதர் ஸல் அவர்கள் கற்றுத் தந்திருக்கிறார்கள்.

ஆனால் இந்த உலக வாழ்வு மறுமைக்கான விளை நிலம் என்பதனை தனது வாக்காலும் வாழ்வாலும் இறைதூதர் ஸல் அவர்கள் இந்த உம்மத்திற்கு கற்றுத் தந்திருக்கிறார்கள். ஆட்சி அதிகாரத்தை செல்வம் செல்வாக்கை தனது பாதங்களிற்கு கீழ் வைத்துக் கொண்ட கருணை நபி உலகின் கடைக்கோடி மனிதனின் எளிமையான வாழ்வையே தேர்ந்தெடுத்ததன் மூலம் இவ்வுலக வாழ்வின், அடைவுகளின் யதார்த்தத்தை உலகறியச் செய்தார்கள்.

பாயில் படுத்துறங்கி எழுந்த இறைதூதரின் (ஸல்) மேனியில் பதிந்திருந்த ஓலைகளின் அடையாளம் கண்டு தங்களுக்கு ஒரு மெத்தையை செய்து தரட்டுமா என்று கேட்ட தோழர்களிடம்; ஒரு மரநிழலில் தங்கிச் செல்லும் வழிப்போக்கன் போன்றவன் நான்; உலக வாழ்வு அத்தகையதே என்றார்கள்.

மஸிஹுத்தீன் இனாமுல்லாஹ்  (08.10.2021)

 

ஜனாஸாக்கள் எரிப்பு விடயத்தில் ஒரு தீர்வுக்கு வர வேண்டிய கட்டாய நிலையில் அரசு.

கடந்த ஒன்பது மாதங்களாக உலக சுகாதார அமைப்பினதும் உலகலாவிய வைரஸ் நிபுணர்களினதும் சுற்றுச்சூழல் புவியியல் நிபுணர்களினதும் வழிகாட்டல்கள் பரிந்துரைகளை அப்பட்டமாக மீறி கொவிட் 19 நோய்த் தொற்றால் மரணித்த முஸ்லிம்களது ஜனாஸாக்களை அவர்களது பலத்த எதிர்ப்பிற்கு மத்தியிலும் இலங்கை அரசு கொளுத்தி வந்தமை அறிந்த விடயமே!

இன்றுவரை சர்வதேச விஞ்ஞான வழிகாட்டல்களை, அடிப்படை  மனித உரிமை நியமங்களை விஞ்சிய (இனமதவெறி அரசியல்) வழிகாட்டல்களை விடாப்பிடியாக திணித்த அதிமேதாவிகளின் பெயர்பட்டியல் வெளியிடப் படவுமில்லை.

முஸ்லிம் அரசியல் சன்மார்க்க சிவில் தலைமைத்துவங்கள் விடுத்த வேண்டுகோள்களை மதிக்காது விடாப்பிடியாக இருந்த அரசு தனது நிலைப்பாட்டில் ஒரு மாற்றத்தை காண வேண்டிய கட்டாய நிலைக்கு இப்பொழுது தள்ளப் பட்டிருக்கின்றது.

இந்த நாட்டின் வரலாற்றில் மிகவும் கறைபடிந்த ஒரு நிகழ்வாகவே இந்த விடயம் பதியப்படுகிறது, உச்சநீதி மன்றில் தாக்கல் செய்யப்பட்ட அடிப்படையுரிமை மீறல் வழக்கில் தீர்வு கிட்டுமென எதிர்பார்திருந்த முஸ்லிம்களுக்கு காரணங்கள் கூறப்படாமலே வழக்கு நிராகரிக்கப்பட்டமை பேரதிர்சியையும் கவலையையும் தந்தது.

இந்த நிலையில் இலங்கைவாழ் முஸ்லிம்களுக்கு ஆதரவாக தமது நிலைப்பாடாடை பாராளுமன்றத்திற்கு உள்ளேயும் வெளியேயும் எடுத்த எதிர்காகட்சித் தலைவர் சஜித் பிரேமதாஸ தலைமையிலான சமகி ஐக்கிய மக்கள் உற்பட சில எதிர்க் கட்சிகளும் பெரும்பான்மையின புத்திஜீவிகள் மற்றும் சிவில் அமைப்புக்களும் பகிரங்கமாக முஸ்லிம்களது அடிப்படை சமய சம்பிரதாய உரிமைக்கான தமது ஆதரவை வெளிப்படுத்தினர்.

அதேவேளை இலங்கையில் உள்ள அரபு முஸ்லிம் நாட்டுத் தூதுவர்கள் அரசாங்கத்திற்கு தமது அதிருப்தியை வெளிட்டிருந்ததோடு முஸ்லிம் நாடுகளின் ஒத்துழைப்பு அமைப்பினூடாகவும் அரசின் கவனத்தை ஈர்த்திருந்தமையும் குறிப்பிடத்தக்கதாகும்.

இந்த நிலையில் ஐ நா மனித உரிமைகள் அமைப்பு, சர்வதேச மன்னிப்புச் சபை உற்பட பல சர்வதேச அமைப்புக்கள் தமது அதிருப்தியை வெளியிட்டிருந்தமையும் குறிப்பிடத்தக்கதாகும்.

சமூக ஊடகங்களூடாக முஸ்லிம் இளைஞர்கள் அரசிற்கும் தமது மக்கள் பிரதிநிதிகளுக்கும் எதிராக வெளியிட்ட பலத்த ஆட்சேபனைகள், வெளிநாடுகளில் வசிக்கும் இலங்கையர் அமைப்புக்கள் கூட்டாகவும் தனித்தனியாகவும் மேற்கொண்ட அழுத்த முயற்சிகள் இலங்கையில் சுயேட்சையாக ஜனசாக்களை கொளுத்துவதற்கு உடன்பட மறுத்த சிவில் புறக்கணிப்பு நடவடிக்கைகள் அரசிற்கு பாரிய அழுத்தங்களை ஏற்படுத்தியது.

இவ்வாறான நிலையில் மஹர சிறைச்சாலையில் ஏற்பட்ட கலவரத்தில் உயிரிழந்தவர்களது பிரேதங்களை எரிப்பதில் எழுந்துள்ள சட்டச் சிக்கல்கள் இறைவனின் நாட்டத்தில் இருந்த மற்றுமொரு நெருக்கடியாக இருந்தது.

இந்த நிலையில் தமிழ் பாராளுமன்ற உறுப்பினர்களும் முஸ்லிம்களது விடயத்தில் தமது அனுதாபத்தை வெளியீட்டு பகிரங்க ஆதரவை வழங்க முன்வந்தமையும் குறிப்பிடத்தக்கதாகும்.

எல்லாவற்றிற்கும் மேலாக 2021  மார்ச் மாதம் ஜெனீவாவில் இடம்பெறவுள்ள சர்வதேச மனித உரிமைகள் அமைப்பின் 45 ஆவது கூட்டத் தொடரில் இலங்கைத் தூதுக் குழுவில் முஸ்லிம் பிரதிநிதிகளை இணைத்தல் அரபு முஸ்லிம் நாடுகளின் ஆதரவைப் பெறுதல் போன்ற இராஜதந்திர கரிசனைகளும் இந்த அரசை நெருக்கடிக்குள் தள்ளியிருக்கிறது.

கொவிட் 19 கொள்ளை நோய் வடித்த காலம் முதல் அதனை இனமதவெறி காழ்ப்புணர்வு சக்திகள் மற்றும் கூலிப்படை ஊடகங்கள் தமது உள்நாட்டு வெளிநாட்டு எஜமானர்களின் கட்டளைகளுக்கு ஏற்ப முஸ்லிம் விரோத அரசியல் நிகழ்ச்சி நிரல்களுக்காக பயன்படுத்தியமை பகிரங்க இரகசியமாகும்.

அதேபோல் அரசியல் தேவைகளுக்காக தம்மால் உருவாக்கி வளர்த்தெடுக்கப்பட்ட இனமதவெறி பூதத்தின் பிடியிலிருந்து வெளியேறுவதற்கு சில தரப்புக்களுக்கு அவகாசமும் தேவைப்பட்டது.

இந்த நிலையில் பறிக்கப்பட்ட ஒரு உரிமையை வென்றெடுப்பதில் மேற்கொள்ளப்பட்ட பல்பரிமாண கூட்டு முயற்சிகளுக்குமான பெருமையை தமது சாதனையாக காட்டுவதற்கு எடுக்கப்படுகின்ற முரசிகளும் முண்டியடிப்புக்களும் நிலைமையை மேலும் சிக்கலாக்கியமையும் மறுக்க முடியாத உண்மையாகும்.

தற்பொழுது நிலத்தடி நீர்மட்டத்தை கருத்தில் எடுத்து ஜனாசக்களை நல்லடக்கம் செய்வதற்கான ஏற்பாடுகளை செய்வதற்கு உரிய ஏற்பாடுகளை கண்டறியுமாறு பிரதமர் மஹிந்த ராஜபக்ஸ அதிகாரிகள் மற்றும் முஸ்லிம் பாராளுமன்ற உறுப்பினர்களுடனான சந்திப்பின் பின்னர் உத்தரவிட்டுள்ளதாக அறிவிக்கப்பட்டுள்ளது.

ஜனாஸா எரிப்பு விவகாரத்தில் இருந்து நாம் கற்றுக் கொள்ள வேண்டிய பாடங்கள் நிறையவே இருக்கின்றன..

இன்ஷா அல்லாஹ் ஜனாசக்களை நல்லடக்கம் செய்து விட்டு தொடர்வோம்..!  

ஷரீஆ சட்டம் தொடர்பான கர்தினாலின் கருத்துக்கு நான் வரைந்த ஆட்சேபனை மடலும் அவரது விளக்கமும்!

CREATOR: gd-jpeg v1.0 (using IJG JPEG v80), quality = 75

ஷரீஆ சட்டம் தொடர்பான கர்தினாலின் கருத்துக்கு நான் (இனாமுல்லாஹ் மஸீஹுத்தீன்) வரைந்த மடலும் கர்தினாலின் விளக்கமும் !

டொக்டர் காவிந்தவுடனான சமீபத்திய நேர்காணலில் ஈஸ்டர் ஞாயிறு தாக்குதல்களில் ஷரீஆ சட்டம் முக்கிய பங்கு வகித்தது என ஷரீஆ சட்டம் தொடர்பில் கருதினால் மல்கம் ரஞ்சித் கூறிய கருத்து ஊடகங்களில் பரவலாக வெளியிடப்பட்டிருந்த நிலையில் நான் கருதினால் அவர்களுக்கு 04.12.2020 அன்று அனுப்பிய கடிதத்துக்கான தனது விளக்கத்தை கருதினால் அனுப்பி வைத்துள்ளார்.

கார்தினால் மல்கம் ரஞ்சித் அவர்களுக்கு அனுப்பப்பட்ட கடிதம்!

இலங்கையின் மதிப்புக்குரிய பேராயர் கருதினால் மல்கம் ரஞ்சித் இலங்கை முஸ்லிம்களுக்கு முன்வைத்திருந்த விளக்கமொன்றை 2020 டிசம்பர் 04 ஆம் திகதிய தேசியப் பத்திரிகை ஒன்று வெளியிட்டிருந்தது.

ஈஸ்டர் தாக்குதல்கள் தொடர்பில் பண்பாடான பெரும்பான்மை இலங்கை முஸ்லிம் சமூகத்தை தீவிரவாதிகளில் இருந்து பிரித்து நோக்கிய துணிச்சலான நிலைப்பாட்டுக்காக இலங்கைப் பேராயர் கர்தினால் மல்கம் ரஞ்சித் அவர்களை இலங்கை முஸ்லிம்கள் மதிப்புடனும் கண்ணியத்துடனும் பார்க்கின்றனர்.

தாக்குதலைக் கண்டிப்பதில் இலங்கை மக்களுடன் உறுதியாக நின்ற அப்பாவி முஸ்லிம் சமூகத்துக்கு எதிரான உணர்ச்சிவசப்பட்ட உடனடி எதிர்வினைகளைத் தடுப்பதிலும், பாதிக்கப்பட்ட மக்களுக்கு ஆறுதல் அளிப்பதிலும் சட்டத்தை நடைமுறைப்படுத்தும் அதிகாரிகளுக்கு முழுமையான ஆதரவையும் ஒத்துழைப்பையும் வழங்கச் செய்வதிலும் அவரது அந்த ஒரு அறிக்கை பெரும்பங்கு வகித்தது.

பாப்பரசர் பிரான்ஸிஸின் பிரதிநிதியாகச் செயற்படும் நிலையில், தேசியப் பத்திரிகையொன்றில் தலைப்பிடப்பட்டிருந்த செய்தி இலங்கையின் முழு முஸ்லிம் சமூகத்தையும் அதிர்ச்சியடையச் செய்தது. ஷரீஆ சட்டத்தை இலங்கையின் சட்டமாக மாற்றுவதற்கு முஸ்லிம்கள் செல்வாக்கினைப் பயன்படுத்தியும் அச்சுறுத்தியும் பலவந்தப்படுத்துகிறார்கள் என்ற தவறான கருத்தைக் கொடுக்கும் வகையில் முஸ்லிம் சமூகத்தின் மீது அடிப்படையற்ற குற்றச்சாட்டுக்களை, அதனை யார் செய்கிறார்கள் என்றோ எந்த நிகழ்வை அவர் குறிப்பிடுகின்றார் என்றோ சொல்லாமல் அவர் அதில் முன்வைக்கிறார்.

அவர் வெளியிட்டுள்ள இந்தக் கூற்று, கொவிட் 19 பெருந்தொற்றை ஒழிப்பதில் முழுத் தேசமும் முயற்சித்து வருகின்ற வேளையில் நாம் நேசிக்கும் நாட்டின் அமைதியையும் பாதுகாப்பையும் சீர்குலைப்பதற்கு அக்கறை காட்டும் இனவாதக் கூறுகளுக்கு அணிசேர்ப்பதைத் தவிர வேறெதனையும் கொண்டுவரப் போவதில்லை.

உலக அளவிலும் குறிப்பாக காயப்பட்ட இந்தத் தேசத்தினதும் திருத்துவப் பணிக்கு முரணான வகையில் சட்டத்தை நடைமுறைப்படுத்தும் அதிகாரிகளால் கையாளப்படும் மற்றுமொரு விவகாரத்தில் தலையிடுமாறு பொதுவான வேண்டுகோளொன்றை முன்வைக்கின்ற ஒரு அரசியல்வாதியுடனான சந்திப்பின் பின்னரே இந்த அரசியல் முனைப்புடைய அறிக்கை வெளியிடப்பட்டது.

கருதினால் மல்கம் ரஞ்சித் அவர்களின் கொழும்பு மறைமாவட்ட அலுவலகம் இந்தச் செய்தி குறித்து விளக்கமொன்றை வழங்கும் எனவும், இலங்கையிலுள்ள திருத்துவ பீட தூதாண்மை இந்த விடயத்தில் தலையிட வேண்டும் எனவும் நாங்கள் எதிர்பார்க்கின்றோம்.

வேதங்கள் மீதான உயிர்த்த ஞாயிறு தாக்குதல்களின் பின்னாலுள்ள தீய சக்திகளை இனம் காண்பதற்கு இலங்கை அரசாங்கமும் இலங்கையின் சட்ட அமுலாக்கல் துறையும் முன்னெடுக்கும் அனைத்து முயற்சிகளுக்கும் தனது முழுமையான ஆதரவையும் ஒத்துழைப்பையும் வழங்கும் என கொழும்பு மறைமாவட்டத்துக்கும் இலங்கையின் சட்ட அமுலாக்கல் துறையினருக்கும் இலங்கை முஸ்லிம் சமூகம் மீண்டும் வலியுறுத்தி உறுதிப்படுத்துகிறது.

பல நூற்றாண்டுகளாக இந்த நாட்டில் அமைதியாக வாழ்ந்த தமது சமூகத்தின் மீதே மேற்கொள்ளப்பட்ட மிக மோசமான தாக்குதலாகவே இலங்கை முஸ்லிம் சமூகம் தமக்கு உரிமை கோர முடியாத ஒரு பிரிவினரால் மேற்கொள்ளப்பட்ட இந்த ஈஸ்டர் தாக்குதலைக் கருதுகிறது.

சர்வவல்லமையுள்ள இறைவன் இந்த நாட்டுக்கும் நாட்டின் அனைத்து மதங்களைச் சேர்ந்தவர்களுக்கும் அமைதியையும், பாதுகாப்பையும், ஸ்திரத்தன்மையையும், செழிப்பையும் வழங்குவானாக.

மஸீஹுத்தீன் இனாமுல்லாஹ்

தேசப்பற்றுள்ள ஓர் இலங்கைப் பிரஜை

04.12.2020

கருதினால் மல்கம் ரஞ்சித் வழங்கிய மறுமொழி

அன்புள்ள இனாமுல்லாஹ்,

உங்களது மின்னஞ்சல் 2020 டிசம்பர் 05 ஆம் திகதி கிடைத்தது. பேராயரின் இல்லத்துக்கு டொக்டர் காவிந்த ஜயவர்தன சமுகம் தந்தபோது நான் வழங்கிய நேர்காணல் தொடர்பில் சில தெளிவுகளை முன்வைக்க விரும்புகிறேன்.

ஜயவர்தன அவர்களே என்னைத் தொடர்பு கொண்டு என்னைச் சந்திக்க விரும்புவதாகத் தெரிவித்தார் என்பதையும் நான் அவருக்கு அனுமதி வழங்கினேன் என்பதையும் முதலில் தெரிவித்துக் கொள்ள விரும்புகிறேன்.

முன்னாள் அமைச்சர் எம்எல்ஏஎம் ஹிஸ்புல்லாஹ்வினால் நிர்மாணிக்கப்படுவதாகக் கூறப்படும் பட்டிகலோ கம்பஸ் குறித்து அவர் பாராளுமன்றத்தில் முன்வைத்த விடயங்கள் தொடர்பில் சில விடயங்களை முன்வைக்கவே அவர் வந்தார். அவரது உரிமை என்ற வகையில் அவர் பாராளுமன்றத்தில் முன்வைத்த விடயங்களை அவர் என்னிடம் முன்வைக்க விரும்பினார். அவரது வேண்டுகோளின் பேரில் அவரைச் சந்திப்பதற்கு நான் அனுமதி கொடுத்தேன்.

எனது அறிக்கையைப் பொறுத்தவரை, நான் ஷரீஆ சட்டத்துக்கு எதிரானவன் என்றோ ஷரீஆ சட்டத்தை பின்பற்ற முஸ்லிம்களை அனுமதிக்கக் கூடாது என்றோ எங்குமே கூறவில்லை என்பதை கூறிக்கொள்ள விரும்புகிறேன். அதைத் தீர்மானிப்பது எனது பொறுப்புமல்ல. கிறிஸ்தவர்கள் பத்துக் கட்டளைகளையும் பௌத்தர்கள் பஞ்சசீலத்தையும் பின்பற்றுவது போல முஸ்லிம்களும் தாம் விரும்பும் சட்டமொன்றை பின்பற்றுவதற்காகத் தெரிவு செய்வதற்கு முஸ்லிம்களுக்குச் சுதந்திரம் இருக்கிறது. அது மதிக்கப்பட வேண்டும்.

ஈஸ்டர் ஞாயிறன்று சிலரால் மேற்கொள்ளப்பட்ட பயங்கரத் தாக்குதல் தொடர்பான விசாரணைகள் விரைவில் நிறைவு செய்யப்பட வேண்டும் எனவும் இதற்குப் பொறுப்பானவர்கள் சட்டத்தின் முன் நிறுத்தப்பட வேண்டும் எனவும் அரசாங்கத்தைக் கோரும் விதமாகவே எனது கூற்று அமைந்திருந்தது, தாமதங்கள் குறித்து நான் எனது அதிருப்தியை வெளியிட்டேன்.

அதுவும் கூட முறையான விசாரணைகள் இன்றி சிறைகளில் தடுத்து வைக்கப்பட்டிருப்பதாகவும் அவர்களின் உரிமைகள் மிதிக்கப்படுவதாகவும் சிலர் வெளியிட்ட எதிர்ப்பின் காரணமாகவே. விசாரணைகள் விரைவில் நிறைவு செய்யப்பட வேண்டியதும் பொறுப்பானவர்கள் தண்டிக்கப்பட வேண்டியதும் முக்கியமானது. பொறுப்பானவர்கள் ஒரு மதத்தைச் சேர்ந்தவரா அல்லது ஏனைய மதங்களைச் சேர்ந்தவரா என்பதல்ல முக்கியம். இது போன்ற செயல்களில் ஈடுபடுபவர்கள் ஒரு மதத்தைப் பிரதிநிதித்துவப்படுத்துபவராக இருக்க முடியாது.

பட்டிகலோ கம்பஸைப் பொறுத்தவரை நான் கூறியது என்னவென்றால், அது ஒரு பல்கலைக்கழகமாக அங்கீகரிக்கப்பட வேண்டுமானால் அது மதம், மொழிகளுக்கு அப்பால் அனைத்து சமூகங்களின் மாணவர்களுக்காகவும் திறந்து விடப்பட வேண்டும் என்பதே.

நான் யாருக்கும் எதிரான எந்தவொரு பாகுபாட்டுக்கும் எதிரானவன் என்பதையும், யாராவது ஏதேனும் தவறு செய்திருந்தால் அவர்கள் தமது மத, இன அடையாளங்களைப் பொருட்படுத்தாமல் தண்டிக்கப்பட வேண்டும் என்பதையும் நான் மிகத் தெளிவாகக் கூற விரும்புகிறேன். எமது சில்லறை விவகாரங்கள் அனைத்துக்கும் மேலாக சட்டத்தின் ஆட்சி நிலைநிறுத்தப்படுவது முக்கியமானது.

இலங்கையில் துரதிர்ஷ்டவசமானது என்னவென்றால், சட்ட அமுலாக்கத்தில் உள்ள சிலர் தவறான செயல்களில் ஈடுபடுபவர்களைப் பாதுகாக்கவும் அரசியல் நோக்கங்களுக்காக உண்மைகளை மறைக்கவும் முயற்சிக்கிறார்கள். யாராவது ஒரு தவறைச் செய்தால், அவர் எந்த அரசியல் கட்சி, இனம், மதத்தைச் சேர்ந்தவராக இருந்தாலும் அவர்கள் தண்டிக்கப்பட வேண்டும். எது சரி, எது தவறு என்பதை அணுகுவதில் பக்கச்சார்பின்றிச் செயற்படுவதற்கு நாம் எப்போது கற்றுக் கொள்ளப் போகிறோம் ?

2019 ஏப்ரல் 21 சம்பவம் நடந்த உடனேயே முஸ்லிம் சகோதர சகோதரிகளுக்கு நான் அவர்களுக்கு மிகவும் தேவையாகவிருந்த பாதுகாப்பை வழங்கினேன் என்பதையும் அவர்களைக் காப்பாற்றினேன் என்பதையும் நீங்கள் புரிந்து கொண்டிருப்பீர்கள் என்று நான் நம்புகிறேன்.

இங்குள்ள எந்தச் சமூகத்துக்கும் நான் எதிரானவனல்ல. நான் அனைவருடனும் இருக்கிறேன். ஆனால் வேறுபாடுகளுக்கு மதிப்பளித்து பெரும்பான்மைக்கும் சிறுபான்மைக்கும் இடையில் சகோதரத்துவ வாஞ்சையை இந்த நாட்டில் வளர்ப்பதற்கு நான் ஊக்குவிப்பும் உற்சாகமும் வழங்கி வருகிறேன். நாங்கள் எங்களது வேறுபாடுகளைக் காட்டுவதிலும் அதனை ஊன்றிப் பிடிப்பதிலும் முயற்சிக்கும் காலமெல்லாம் இந்த நாடு தொடர்ந்தும் பாதிப்புக்கே உள்ளாகும். யுத்தத்தின் 30 வருட கால பேரழிவுக்குப் பிறகாவது நம்மைப் பிளவுபடுத்தும் விடயங்களை விட நம்மை ஒன்றிணைக்கும் விடயங்களைப் பற்றி அதிகமாகப் பேசுவதற்கு நாம் கற்றுக் கொள்ள மாட்டோமா ?

நான் ஒரு கத்தோலிக்கன். ஆனால் எனது கத்தோலிக்க அடையாளம் இந்த நாட்டில் பிளவை ஏற்படுத்துவதனை நான் விரும்பவில்லை. அத்தகைய வேறுபாடுகளை வளர்க்கும் சிறப்புச் சலுகைகளைத் தவிர்க்கவே நான் விரும்புகிறேன்.

மதங்களுக்கும் இனங்களுக்கும் இடையிலான நட்பையே நான் எப்போதும் வலியுறுத்தியுள்ளேன். அதற்காக நான் துணிந்து நிற்கிறேன். நாமனைவரும், வேதங்களின் மக்களும் ஏனையவர்களும், நம்முடைய வேறுபாடுகளை அழுத்திப் பிடிக்கக் கற்றுக் கொள்ளாமல் நம்மை ஒருங்கிணைக்கும் விடயங்களைக் கற்றுக் கொள்வோம்.

அப்பொழுது நம்மால் அடுத்தவரது அடையாளத்துக்கு மதி்ப்பளிக்க முடியும். குறிப்பாக நமது இளைய சந்ததியினரிடையே உணர்ச்சிகளைத் தூண்டிவிடாமல் ஒரு தேசத்துக்குள் நம்மை ஒருங்கிணைத்துக் கொள்வதற்கு கற்றுக் கொள்வோம். ஈஸ்டர் ஞாயிறு தினத்தில் கிறிஸ்தவர்கள் அதனைப் பரந்த பொறுமையுடன் வெளிப்படுத்தினார்கள். எதிர்காலங்களிலும் நாங்கள் இதனைத் தொடர்வோம் என்று நான் உங்களுக்கு உறுதியளிக்கிறேன்.  எம்மைப் பொறுத்தவரை முஸ்லிம்கள் அளவற்ற அருளாளனான எல்லாம் வல்ல இறைவனை நம்புபவர்கள். நாங்களும் அதனையே நம்புகிறோம். இதில் நாங்கள் ஒன்றாய் இணைந்திருப்போம்.

கடவுள் எமது நாட்டுக்கும் நாட்டு மக்களுக்கும் அருள்பாலிப்பாராக.

உங்களது உண்மையுள்ள,

மல்கம் கர்தினால் ரஞ்சித், கொழும்பு பேராயர்.


05.12.2020